Speed cop mi-serve sa eleksiyon giatake

Kritikal ang kondisyon sa usa ka polis nga nagbantay sa gipahigayong barangay ug SK election human kini giatake sa iyang high-blood didto sa  Basak, dakbayan sa Lapulapu sa milabay’ng gabii.

Ang giatake mao si PO3 Melchor Jagdon, 42, minyo ug lumad sa  Casuntingan, Mandaue ug nadestino sa Speed cop sa kapolisan sa Lapulapu.

Base sa pamahayag ni  Insp. Francisco Bagiuo, hepe sa Homicide Section sa kapolisan sa Lapulapu nga posibleng nasobrahan sa kakapoy si PO3   Jagdon hinungdan sa pagtaas sa iyang dugo nga miabot na sa 280 / 120 nga maoy hinungdan sa iyang pag-atake.

Gumikan sa pagtaas sa iyang dugo naglisod kini og ginhawa ug nagsukasuka kini hinungdan nga gidala kini sa Mactan Doctors Hospital ug gibalhin sa Sacred Heart Hospital sa dakbayan sa Sugbu.

Matud pa ni Bagiuo nga sa milabay’ng adlaw sa pagpahigayon sa eleksiyon si PO3 Jagdon nadestino kini sa  Basak alang sa pagmonitor sa kahapsay sa dagan sa trapiko sa maong dapit ug sa mga 7:30 na sa kagabhion kalit lamang kini nga natumba, nagsuka ug dili na makaginhawa.

Pipila ka mga residente sa maong dapit midala ni Jagdon sa tambalanan ug sa pagsuwat ning balita anaa pa kini sa kritikal nga kondisyon ug ipahigayon ang pagpaopera sa iyang ulo gumikan sa blood clot niini resulta sa iyang pagkaatake sa high blood.