80 ka balay sa Maguikay nangaugdaw

Naugdaw ang  80 ka mga balay sa nahitabong sunog  sa sitio Salvacion, barangay Maguikay, dakbayan sa Mandaue nga nagbilin og mokabat sa P1.1 milyon ang danyos nga nagsugod lang sa gibiyaan nga kandila.

Si Mandaue City Fire Marshal  Oscar Mayol mipaubos sa maong sunog nga 3rd alarm nga maoy hinungdan sa paghidangat sa uban pang kabomberohan sa dakbayan sa Sugbo, Lapulapu ug Consolacion.

Si SF01 Roy Garcia, imbestigador sa kabomberohan sa maong dakbayan nga gihinabi sa Banat News miingon nga nagsugod ang kalayo sa lawak sa panimalay  nga gipuy-an sa usa ka Anatacia Ytang.

Gipanag-iya ni Allan Codilla ang maong panimalay nga gipuy-an ni Ytang nga ginama sa light materials nga maoy hinungdan nga dali kaayo ang pagkaugdaw niini.

Dugang pa ni SF01 Garcia nga nagsikitsikit ang mga balay sa maong dapit nga pulos ginama sa light materials ug dali kaayo nga nakakaylap sa tibuok dapit niini.

Si SF01 Garcia miingon nga gamay ang dalan paingon sa nahimutangan sa nasunog nga mga balay nga maoy hinungdan nga naglisod ang ilang trak sa bombero sa pagsulod niini.

Matud pa ni SF01 Garcia nga ang sunog nga ilang gialarma alas 12:15 sa miaging tungang gabii  nga ilang nakontrolar sa paglabay sa 50 minutos.

Milungtad og tulo ka oras nilang pagpawong sa kalayo nga hingpit na nga dili na motapon sa kabalayan nga nahibilin sa palibot niini.

Si SF01 Garcia miingon nga nagdagkot og kandila si  Ytang nga gituohang napasagdan ug dihang naupos mikaon ang kalayo sa salog hangtod na sa tibuok balay nga nakaingon sa pagkaugdaw niini.