Military way malapas nga balaod kung NPA supporters ipublikar

Gitataw sa Commission on Elections (Comelec) nga way kalapasang mahimo ang militar kun ipahibawo nila sa katawhan ang mga kandidatong gipaluyohan sa mga rebelde.

Sumala ni Comelec Provincial Supervisor Lionel Marco Castillano nga katungod sa militar ang paghimo sa ingon sanglit sila ang gitahasan sa pagbantay sa kalinaw ug kahusay sa nasud.

Ang pamahayag ni Castillano maoy iyang reaksyon sa laraw ni Lt. Rey Bañares sa 78th Infantry Battalion sa pagpahibawo sa katawhan sa mid-north Cebu bahin sa ngalan sa mga kandidato nga gipaluyohan sa mga New People’s Army kon NPA.

Si Bañares mitunol na sa listahan sa maong mga kandidato ngadto sa buhatan sa Central Command aron katabangan sila sa mid-north sa pagpalig-on sa ilang puwersa didto ning umaabot nga piniliay sa barangay ug Sangguniang Kabataan.

Si Bañares sa sayo pa miingon nga dili sila mangampanya batok sa maong mga kandidato kay wa silay labot sa pangampanya apan igo na kaayo alang kanila nga masayran sa katawhan ang mga tawong ilang botohan ug pilion aron mahimo nilang lider sa ilang barangay.

Dinhi usab masuta matud pa ni Bañares ang matang ug kalidad sa mga molupyo sa usa ka barangay kay kun makadaog ang mga kandidatong suportado sa NPA luyo sa kasayoran na sa mga pumipili, nagpasabot nga sa maong barangay kasagaran sa mga molupyo suporter sa mga rebelde ug dili na angayang kompiyansahan sa militar.

Sa bahin sa Comelec, si Castillano nagkanayon nga wala usay balaod nga nagpugong sa mga komunista pagkandidato sa nasud, sanglit ang gigukod sa balaod dinhi mao ra man ang kasamok nga ila unyang idulot sa komunidad.

Gisubli ni Castillano nga andam na ang tanang sakop sa 78th IB nga mosuporta sa kapolisan sa Lunes aron bantayan ang kapin 2,000 ka barangay sa lalawigan.