SWAT – Mandaue nangharas

Gimando ni  Sr. Supt. Rodel Calungsod ang pag-imbestigar sa reklamo ni Kapitan Zaldy Lumapas sa barangay Umapad, dakbayan sa Mandaue nga giharas sa mga polis ang mga tawo  nga mitambong sa ilang pulongpulong niadtong Domingo sa gabii.

Si Sr. Supt. Calungsod miawhag usab kang  Lumapas sa pagduso og pormal nga reklamo ngadto kang  Inspector Ramon Villa, hepe sa Intelligence and Investigation Division sa MCPO alang sa tukmang lakang niini.

Si PO3 Joel Arcenal sa SWAT miila sa ilang mga kauban nga mitubag og alarma sa Umapad nga mao sila si PO2 Roy Gonzalez, PO2 Randy Chavez ug PO2 Dendie Trangia.

Matud pa ni Calungsod nga sa iyang pasiunang pakisusi maoy iyang nahibaw-an nga gikataho sa usa ka Amay Mendoza sa buhatan sa SWAT ang labot sa armadong mga lalaki sa Umapad, dakbayan sa Mandaue.

Si Amay Mendoza giilang kandidato alang sa pagka konsehal sa pundok ni Militon Cortes nga maoy higpit nga kaatbang  ni  Lumapas.

Sa reklamo ni  Lumapas kinsa nagpasubli sa lain niyang termino miingon nga nabungkag ang gihimo nilang kalingawan dihang nahidangat ang mga SWAT nga nangrikisa sa mga tawo ug gipanionan sa armalite.