Walay tulobagon ang mga tawo nga mipakatap sa mga leaflet diha sa Barangay Lahug ning dakbayan nga nagbutang sa detalye sa mga hinabang nga nahatag sa kagamhanan sa dakbayan sa Sugbu sa maong lugar.
Kini maoy gipadayag ni Comele Cebu City north district election officer Marchel Sarno nga nahinabi sa Banat News gumikan kay walay nalapas nga probisyon sa balaod ang maong mga leaflets.
Si Sarno mipasabot nga dili kini makonsiderar nga campaign materials sa election hinungdan nga walay bisan unsang kaso nga mapasaka niini tungod kay ang gikonsiderar lang sa Comelec mao nga ang campaign materials nga mopadako sa pangalan sa usa ka tawo.
Apan kun walay tawo ang gibutang niini nga magpapili dili kini makonsiderar nga “libelous” batok sa usa ka kandidato ug gani sila walay mahimong hurisdiksyon sa pagbadlong sa maong materials.
Iyang giklaro nga dili gyud mabadlong kun ang unod sa maong material o leaflet pabor man o dili sa usa ka kandidato kun walay makapamatuod nga napatik ang usa ka pangalan sa usa ka pulitiko sa maong leaflet nga maghatag og bintaha sa kampanya nga gidili sa Comelec.
Sa iyang bahin, si Lahug Barangay Kapitan Mary Ann delos Santos mipadayag nga wala niya hatagi’g pagtagad ang maong isyu tungod kay wala siya mahulga niini ingon man sa iyang mga kaalyado kini tungod kay kanunay na kining himuon sa city hall panahon sa eleksiyon batok kaniya.
“Dili na lang ko magminaut, dili na lang ko manghambog ba, dihang magkaatbang mi sa niaging eleksyon, nagkalain-lain na lang papel iyang gipakatap diri sa Lahug, bisan unsa na lang iyang gihimo nga pagpanaut nako, apan gilubong man gihapon siya nako diri og 3,500 votes, so, ang mga tawo na lay muhosgar ana,” sumala ni delos Santos.
Nunot niini, iyang gihagit si Mayor Tomas Osmeña nga mas makaayo nga modagan na lang kini sa pagka barangay kapitan diha sa Lahug kini tungod kay mihimo na usab kinig mga lakang nga sama nga sila maoy magtigi sa pagka-kapitan.
Gipaneguro niini nga ilang paningkamotan nga mogawas nga 7-0 ang resulta sa barangay election diha sa Lahug kini tungod kay tataw na man usab kaayo nga wala nay motuo sa mayor diha sa ilang barangay ug sa mga sakop niini nga gipadagan sa mayor.