Nasikop sa mga polis ang 25-anyos nga lalaki nga hubog nga gipasanginlang nanglugos og katabang niadtong Miyerkules sa gabii diha sa Barangay Lawaan II, dakbayan sa Talisay.
Ang suspetsado giila sa kapolisan nga si Jojo Rellon, ulitawo, apan adunay kapuyo, taga Barangay Balirong, dakbayan sa Naga ug kargador diha sa Carbon market.
Ang biktima mao si Jona (tinuod ngalan gipugngan), 30-anyos nga biyuda, dunay duha ka anak, stay-out nga katabang diha sa usa sa mga residente sa Camella Homes.
Si Jona sa pakighinabi niini sa Banat News kagahapon sa buntag nagkanayon nga gikan sa balay sa iyang amo nagsakay siya og habal-habal ug nanaog diha sa eskina sa Lawaan II habig sa South Coastal Road dayon naglakaw siya paingon na nga mopauli.
Ang biktima wala makabantay ni Rellon tungod kay nagduko man kining naglakaw ug pag-abot niya diha sa bakanteng lugar sa kilid sa BF Homes kalit lang gisampongan sa suspetsado ang baba ni Jona ug nagkanayon nga “dili ka gustong mamatay ayaw og daghang langas.”
Matud ni Jona nga giguroy siya ni Rellon sa kalibunan og gisigehan og sukmag ang iyang kuto-kuto hinungdan nga wala na siya makasukol ug na-among-amongan gyud siya.
Si Jona mipasangil ni Rellon nga paghuman og lugos kaniya gisita siya niini kun aduna ba siya’y kuwarta.
Si Jona nagkanayon nga adunay sulod nga P350 ang iyang pitaka nga ipalit niya og bugas nga konsumo nila ug sa iyang mga anak apan wala niya kini itug-an ni Rellon ug giitsa niya ang iyang pitaka sa dihang nalipat ang suspetsado.
Si Jona midungag nga nagpakiluoy siya ni Rellon nga dili hilabtan tungod kay aduna siya’y mga anak nga naghuwat kaniya.
Si SPO4 Henry Obiso polis sa Talisay sa pakighinabi niini sa Banat News nagkanayon nga ang guwardiya sa BF Homes mitawag diha sa police station ug nagpahibawo kabahin sa maong insidente.
Ang alert team pinangulohan ni PO3 Edwin Alvaro ang miresponde sa maong alarma.
Naabtan nila ni Alvaro si Rellon ug Jona diha sa lugar nga nahitaboan ug gisita sa mga polis ang suspetsado.
Matud ni Obiso nga si Rellon nagkanayon ngadto sa mga polis nga managtiayon silang duha apan si Jona naghilak nga namalibad mga dili sila magtiayon.
Si Rellon misukmag sa drayber sa mga polis ug dayon dagan hinungdan nga nahitabo ang ginukdanay.
Ang mga polis mipabuto og warning shot apan wala gyud mohunong si Rellon ug pagtabok niini diha sa national higway sa Lawaan I naligsan ang tuong tiil niini sa usa ka jiffy apan wala hunonga sa drayber.
Naabtan sa mga polis si Rellon nga nagligid na diha sa karsada ug gidala kini diha sa Talisay District Hospital dayon gitanggong kini sa mga polis sa detention cell.
Si Rellon sa pakighinabi niini sa Banat News kagahapon sa buntag miangkon nga hubog siya ug nagkasabot sila ni Jona apan kadto pa silang adlawa nagkakita diin iya kining giagbayan.
Si Rellon midungag nga mitanyag siya ni Jona nga iyang pakaslan.