Tindero gipusil tungod sa derby sa kaka

Usa ka tindero og buwad ang giatangan og gipusil sa iyang gikalalis tungod sa derby sa “kaka” dihang nagsakay kini og bisikleta paingon sa ilang pinuy-anan sa miaging buntag diha sa dalan Calderon Warwick Barracks Barangay Ermita, niining dakbayan.

Ang biktima giila sa mga polis nga si Ronnie Escaran 43, taga Magsaysay Sawang Calero niining dakbayan ang gipusil ni Tom-Tom Zamora taga Barangay Ermita niini usab nga dakbayan.

Daling gihatod diha sa Cebu City Medical Center si Escaran apan pipila ka oras ang milabay namatay gyud kini diha sulod sa maong tambalanan.

Base sa imbestigasyon ni PO2 Geoffrey Gutual uban sa ubang mga sakop sa homicide section sa CCPO nga sa wala pa mahitabo ang pagpamusil naglalis nang daan ang biktima ug suspek tungod lang sa derby sa kaka tungod kay wala magkasinabot ang duha sa pustada nga misangko sa kasuko sa suspek.

Si PO2 Julious Mabunay sa homicide section mibutyag sa Banat News nga mipusta si Escaran sa kaka ni Zamora apan misikrito usab kini og pusta ngadto sa kontra ug nahibaloan kini sa suspek hinungdan nga nasuko kini nga maoy sinugdanan sa ilang panaglalis.

Si Zamora daling miikyas human sa insidente ug padayon pa kining gipangita sa kapolisan.