Gradwado sa engineering nagpusil sa dughan

Usa ka 22-anyos nga lalaking bag-uhay lang mitapos sa kursong engineering ang napalgang patay sulod sa bodega sa balay sa iyang gipuy-ang iyaan ug gidudahang naghikog pinaagi sa pagpusil sa iyang dughan niadtong milabay'ng adlaw diha sa Villa Cristina Subdivision sa barangay Punta Prinsesa ning dakbayan.

Gituohang naghikog ang biktima gumikan sa kaguol nga siya gibuwagan sa iyang uyab, base usab sa nakuhang impormasyon sa kapolisan gikan sa iyang mga kabanay.

Ang maong lalaki giilang si Marvin Roy Bagcat, 22, residente sa maong dapit nga nagpuyo sa balay sa iyang iyaan nga si Eva Cañete, 40.

Sa imbestigasyon   ni SPO1 Jay Yballe sa Homicide Section, si Bagcat napalgan nalang sa iyang iyaan ug sa anak niini diha sulod sa bodega sa second floor sa ilang balay nga naghigda ug nagkadugo.

Matud pa nga diha sa silong si Eva ug anak ingon man katabang dihang nakadungog sila og usa ka paka kaayong buto sa armas gikan sa ibabaw hinungdan nga gidali nila kini og susi.

Si Bagcat dunay usa ka samad pinusilan diha sa walang bahin sa dughan hinungdan nga dali silang mitawag og mga sakop sa Emergency Rescue Unit Foundation apan dihang gihiling wala na kini mopakita og kinabuhi.

Sumala pa sa iyaan niadtong summer lang  mitapos sa iyang kursong Bachelor of Science in Engineering si Bagcat ug gikatakda untang mopaso sa iyang graduation niadtong Sabado sa hapon.

Gikatahong pipila na ka bulan ang nakalabay gibuwagan sa uyab niini si Bagcat apan bisan giunsa niini og hangyo nga makigbalik, giingong wala na mosugot ang iyang uyab.

Usa ka kalibre.38 nga paltik revolver ang nakit-an sa kapolisan diha sa iyang tupad nga may usa ka basiyo sa bala ug usa ka buhing bala sa tambor niini.