Lagda sa Comelec subling gipahibalo kay dunay milapas

Subling giawhag sa Commission on Election (Comelec) ang mga kandidato sa synchronized Sangguniang Kabataan ug barangay election sa pagsubay sa mga lagda nga higpit nilang gipatuman.

Si Comelec Regional Director Rene Buac miingon nga naglakip sa ilang lagda mao ang pagdili sa mga kandidato nga nakaduso na sa ilang certificate of candidacy (COC) sa dili pagpahigayon og pasiunang kampanya.

Dugang pa niya nga higpit nilang ipatuman ang mga lagda nga naglakip sa ilang higpit nga pagpatuman sa insaktong sukod sa mga campaign materials nga naglakip sa banners ug streamers.

Ang gitugot alang sa mga adlaw sa kampanya magsugod sa tungang gabii sa Oktubre 19 ug matapos sa tungang gabii sa Oktubre 27  ug ang mga campaign materials sa mga kandidato adto ipahimutang sa mga  dapit nga gideklarar nga common poster area.

Higpit nilang gi-regulate ang sukod sa mga campaign materials nga mahimong i-print o hand written ug masunod usab ang gasto sa matag kandidato nga P3 alang sa matag botante.

Ang mga gisulat sa kamot o gi-imprinta nga campaign materials maoy gitugot ang 81/2 by 14 pulgada ug ang posters dili usab molapas sa 2 feet by 3 feet ug usa lamang ka poster ang ibutang sa matag common poster area.

Dugang nga gidili mao ang pag-endosar og mga kandidato nga nagdala og partido hangtod ang pagdawat o paghatag og transportation allowance, pagkaon o ilimnon sulod sa lima ka oras sa dili pa o human sa barangay assembly,  meeting hangtod na sa barangay election.

Namatikdan man gud sa Comelec nga dunay daghang mga kandidato sa pagka-opisyal sa barangay karon ang nilapas na sa mga lagda sa Comelec.

Kini bisan pa man nga sila gipahibalo na sa polisiya nga buot ipasunod sa ilang buhatan.