Usa ka lalaki nakalingkawas sa pagpamusil ug pagpanunggab human kini misukol sa amahan ug anak ug daling miikyas human sa hitabo niadtong Sabado sa hapon sa Barangay Pooc, dakbayan sa Talisay.
Ang biktima giila sa mga polis nga si Okmad Abaquita, 23, taga Sitio Ranger sa maong barangay.
Ang suspetsado mao si Saturnino Crio alyas “Long” 40, ug ang anak niining si Christopher 18, mga residente usab sa nahisgutang barangay.
Base sa pasiunang imbestigasyon sa kapolisan sa siyudad nga si Abaquita nagmeriyenda diha sa tindahan sa iyang iyaan ug sa walay igong rason giduol kini ni Saturnino ug gisukmag tulo ka higayon sa nawong ug lawas.
Human sa panukmag mihulbot og pusil si Saturnino ug gition sa ulo ni Abaquita ug dayon kablit sa gatilyo apan dali usab nga natapi ni Abaquita ang kamot sa suspetsado hinungdan nga wala kini maigo sa maong pagpamusil.
Nahitabo ang linayogay ni Abaquita ug Saturnino kinsa ang duha nag-inilogay sa armas ug sa panag-ilog sa duha sa armas nakablitan na usab ang gatilyo sa pusil ug mibuto na usab kini duha ka higayon apan walay nangaigo sa maong insidente.
Atol sa linayogay, si Christopher miduol kini ug gidunggab si Abaquita apan nagunitan sa biktima ang kamot ni Christopher.
Wala matagbaw si Christopher giusban og dunggab niini si Abaquita ug naigo sa abaga ang biktima sa maong higayon.
Si Condrado Briones, tanod sa barangay daling miduol ug miuwang sa tulo.
Si Briones usab ang mitaho sa kapolisan sa maong insidente.
Ang kapolisan mipahigayon og follow-up nga imbestigasyon pagsuta sa tinuod nga motibo sa insidente.