Mga candy gikan sa China i-pullout

Ipa-pullout ni  Konsehal Arsenio Pacaña ang tanang  China made candies nga gipamaligya dinhi sa dakbayan.

Kini pinaagi sa iyang ipalabang nga resolusyon atol sa sesyon sa city council karong umaabot nga miyerkules.

Ang lakang sa konsehal gipahaom usab sa nahitabong pagkahilo sa dul-an sa 40 ka mga tinun-an didto sa isla sa Bantayan sa niaging semana.

Gitumbok ang Ube Milk Candy nga dunay tatak nga hinimo sa China nga maoy nakalanag sa mga bata dihang sila nangaon niini.

Kini gikabalak-an ni   Pacaña tungod kay giingong diha sa Carbon palita ang maong candy sa namaligya niini didto sa nahisgutang isla.

Gustong maniguro ang konsehal sa iyang pagpa-pullout sa tanang Chinese-made candies aron dili na masubli ang nahitabo didto sa Bantayan island.

Buot ni Pacaña nga mapa-ubos sa mandatory testing ang tanang candy ilabina kadtong gikan sa China sa dili pa kini iapod-apod sa merkado.

Gitataw ni Pacaña nga mahimong ibalik pagbaligya ang nahisgutang imported nga mga candy kung mapamatud-an sa laboratory test nga kini luwas kan-on.

Ang Bureau of Food and Drugs (BFAD-7) maoy giawhag sa konsehal nga mohimo ug lakang alang sa pag-pullout sa tanang Chinese-made candies nga gibaligya sa merkado.

Nasayran sa Banat News nga ang BFAD-7 nibawi na sa mga Chinese-made products sa niaging Hulyo 17, nga gikatahong dunay sagol nga formaldehyde.

Kini naglakip sa White Rabbit Creamy Candy, Milk Candy, Bairong Grape Biscuits, ug Yong Kang Foods Grape Biscuits.

“It is unfortunate that BFAD-7 in its report, Ube Milk Candy was not in the list of some China-made products that were ordered withdrawn,”sumala pa sa resolusyon ni Pacaña.

Alang sa konsehal nga ang pagpa-ubos sa mandatory testing sa tanang candy, maoy magsiguro sa health and safety sa mga konsumidor ilabina sa kabataan.