School buses parehason og kolor –– Davide

Gitinguha karon sa konseho sa siyudad sa Sugbu ang dinaliang pagpatuman sa unipormadong kolor sa mga school bus dinhi sa dakbayan.

Kini human usab aprobahi ang resolusyon nga gipalabang ni Konsehal Hilario Davide III atol sa niaging sesyon sa konseho nga alang sa maong katuyuan.

Ang City Council niawhag sa Land Transportation Franchising and Regulatory Board kon LTFRB-7, nga maoy unang mupatuman niini dinhi sa nasud.

Nasayran sa Banat News nga ang ulohang buhatan sa LTFRB, duna nay giluwatang memorandum alang sa implemintasyon sa maong programa.

Ang memorandum naglatid nga yellow ang kolor nga ipintal sa tanang mga bus de pasaheroan sa nasud.

Apan matud ni konsehal Davide nga kini unya pa sa tuig 2009 hingpit nga ipatuman sa nahisgutang ahensya.

Gipadayag sa konsehal nga kung mahimo nga karon sugdan pag-implementar ang maong programa  dili na angayang magpaabot pa og pipila ka tuig.

Gitataw ni Davide nga mas nindot nga usa lang ka kolor ang mga school bus aron kini dali nga maila sa ubang motorista.

Tumong niini nga mahatagan og pabor sa dalan ilabina kung mga bata ang sakay sa school bus, sa ingon mahatagan usab kini og proteksyon.

Sa pikas bahin, nagplano usab ang konsehal pag-awhag sa LTFRB-7 pinaagi sa pagpalabang  og resolusyon sa konseho nga ipatuman ang yellow plate sa mga school bus.

Nahibaw-an sa konsehal nga kasagaran sa mga school bus sa dakbayan, nagtangag pa  og green plate, ug gituuhang wala  mulokat og prangkisa ang mga tag-iya niini.

Nasayran nga gikinahanglan unang matuman ang mga rekisitos alang sa usa ka school bus sa dili pa kini hatagan og prangkisa.

Pipila niini mao ang pagbutang og grill sa bintana ug pagbutang og laing agianan sa tumoy nga bahin sa sakyanan.