Duha ka construction worker gitipi sa 66-anyos caretaker

Duha ka construction worker   patay samtang usa ang naangol human sila gisaka ug gipanunggab sa caretaker sa panimalay nga ilang gipuy-an diha sa dalan Col. Torralba sa barangay Apas ning dakbayan kagahapon sa kaadlawon.

Ang nangakabsan sa kinabuhi giilang sila si Jerry Borja alyas Jerry, 39, stay-in worker sa maong dapit ug Jason Dello alyas Goning, 24, lumad nga taga Kambungol, barangay Santol sa Negros Occidental.

Samtang ang naangol nga may samad dinunggaban sa walang bahin sa dughan mao si Arnulfo Limbo alyas Boboy,23, lumad nga taga barangay Gimpanaan, Magallon, Negros Occidental.

Kulatado usab ang suspek nga si Fernando Medina, Jr. 66, residente sa J.C. Zamora sa barangay Parian human kini kuniniti sa mga estambay diha sa dapit atol sa iyang pag-eskapo.

Sa imbestigasyon nila ni SPO4 Dennis Moga,Jr., PO2 Jeffrey Gutual ug PO1 Michael Codaste nasuta nga gisulod sa suspek ang lawak sa mga biktima diha sa ikaduhang andana.

Ang suspek armado og automatic nga kutsilyo ug gihansakan makadaghang higayon ang nangatulog nga biktima, unang nadunggaban si Borja kinsa nakaangkon og upat ka dinunggaban sa walang bahin sa dughan.

Atol sa kagubot nahigmata ang laing duha apan sila gisunod og dunggab sa suspek diin si Dello naigo gihapon sa walang bahin sa dughan ug mao usab si Limbo apan nakahigayon sa pagdagan pagawas sa balay.

Si Dello daling gidala sa mirespondeng sakop sa Mobile Patrol Group ug gidala sa Cebu City Medical Center apan nakabsan kini sa kinabuhi samtang gitabang sa mga mananambal samtang si Limbo gidala usab sa Vicente Sotto Memorial Medical Center.

Ang mirespondeng mga sakop sa Beat Patrol Section sa CCPO nga sila si PO1 Noel Melecio Belicario ug PO1 Jerry Gambi mao nay midakop sa suspek kinsa niadtong tungura gikatahong gikulata sa mga tawo.

Ang kutsilyong gigamit sa pagpatay narekober usab sa kapolisan nga dunay daghang lama sa dugo.

Si Medina dihang gihinabi sa mga tigbalita nagkanayon nga iyang gibadlong ang mga biktima nga dili magpunay og inom diha sa taas apan gikatahong wala siya tuohi ug gibugal-bugalan hinuon siya hinungdan nga iya silang giatake.