5 ka engineer gisuspenso sa ombuds balik sa Mandaue

Human sa unom ka bulan nga pagkasuspenso nga gipahamtang sa Ombudsman sa lima ka enhinyero sa Mandaue City gumikan sa kalambigitan sa overpricing sa lamppost kagahapon pormal na kini nga namalik sa ilang trabaho ug mipakita kang Mandaue City Mayor Jonas Cortes.

Ang mipakita ni Cortes mao ang kanhi OIC City Engineer nga si Engr. Hedeliza Latonio, Engr. Greg Omo, Engr. Alfredo Sanchez, Engr. Mario Herolaga ug Engr. Rosalina Denque alang sa ilang pormal nga pagbalik sa ilang trabaho.

Ang upat ka mga enhinyero nahibalik sa ilang kanhi puwesto samtang si kanhi OIC City Engineer Latonio nagpabiling anaa sa maong buhatan ug wala makaasumer sa kanhi posisyon gumikan kay anaa pa ang OIC City Engineer nga si Engr. Dario Mago.

Matud pa ni Atty. Hidelito Pascual ang PIO sa kagamhanang lokal sa Mandaue nga sa pagkakaron ang lima ka mga enhinyero hatagan nila og laing trabaho gawas sa ilang trabaho sulod sa City Engineering Office sama ni Engr. Omo nga maoy gitahasan ni Cortes nga maoy magbantay sa pagahimuong rehabilitasyon sa ihawan sa dakbayan sa Mandaue nga karon wala na magamit gumikan sa kagubaon na niini.

Kahinumduman nga ang lima ka enhinyero lakip sa gisuspenso sa Ombudsman uban ni kanhi Mayor Thadeo Ouano ug LapuLapu City Mayor Arturo Radaza ug ang iyang mga sakop usab sa City Engineers sa dakbayan sa LapuLapu gumikan sa kalambigitan niini sa pagpaburot sa presyo sa decorative lamppost atol sa gipahigayong 12 Asean Summit dinhi sa Sugbu.