Veto ni Cortes sa ordinansa vs tigbakay wa magsilbe

Ang ordinansa nga gi-veto ni Mayor Jonas Cortes nga nagdili sa pagpasiugda og tigbakay sa matag panahon sa piyesta sa barangay o kapilya  hingpit nga ikapatuman human ma-override ang veto power niini.

Sa pag-veto ni  Cortes, gibasehan niini ang Presidential Decree 449 kun gitawag nga  Cockfighting Law of 1974 nga nagtugot sa pagpasiugda og tigbakay sa panahon sa Domingo, legal holiday ug lokal nga piyesta.

Si Konsehal Emiliano Rosal nga gikahinabi sa Banat News mipasabot nga ang maong ordinansa nga gipangamahanan ni Majority Floor Leader Victor Biaño   naghatag og pabor sa mga nanag-iya og buwangan sa dakbayan.

Matud pa niya nga ang paghatag og pagtugot sa tigbakay sa matag panahon sa kasaulogan sa tinuig nga pangilin sa kapilya sa kabarangayan   nagpasabot nga kompetinsiya kini sa mga buwangan.

Gipasabot ni Rosal nga maoy hangyo sa religious sector sa dakbayan nga kapugngan  ang naghitak nga sugal nga naglakip na sa tigbakay sa kabarangayan nga ang pasangil nagsaulog sa tinuig nga pangilin.

Si Bise Mayor Carlo Fortuna sa iyang pamahayag miingon nga ang paghatag og pagtugot sa kagamhanan sa dakbayan sa pagpasiugda og tigbakay sa matag tinuig nga pangilin sa barangay gihimo nga matag adlaw nga tigbakay.

Giklaro ni Fortuna nga hapit matag adlaw sa dakbayan may nagsaulog nga pangilin sa ilang kapilya nga mao lamang ang basehan alang sa pagtugot.