Gipasigarbo ni Mayor Tomas Osmeña ang 51st Marine Reserve Batallion human kini makadawat og tulo ka sunod-sunod nga pasidungog sa niaging tulo ka tuig.
Ang nahisgutang battalion napili na usab nga 2007 Armed Forces of the Philippines ug 2007 Philippine Navy’s Most Outstanding Ready Reserve Unit of the Year (Battalion level).
Kini tungod sa giingong meritorious accomplishments niini sa Area of Civil Military Operations, Disaster Response, ug Training and Community Related projects.
Si Mayor Osmeña kinsa na-instalar nga Lieutenant Colonel sa Marine Reserve maoy gitudlong commander sa nahisgutang batalyon.
Nunot niini ang mayor gipasidunggan tungod sa iyang natampo sa tinguha alang sa advancement sa mga reservist ug sa Reserve Force Development program.
Sa samang higayon si Osmena nakadawat usab og award isip Philippine Navy’s Reservist Officer of the year 2007.
Ang awarding gipahigayon atol sa kasaulugan sa 28th AFP National Reservist Week Celebration, didto sa Camp General Emilio Aguinaldo sa kauluhan niadtong Septembre 8.
Si kanhi senador Cerge Osmeña III nga igsoon sa mayor maoy nirepresentar ug nidawat sa nahisgutang mga pasidungog.
Kahinumduman nga ang 51st Marine Reserve Battalion ni Osmeña, mao usab ang napiling Most Outstanding Reserve Unit of the Year sa Philippine Navy niadtong tuig 2005 ug 2006.
Subay niini gipadayag ni Mayor Osmeña nga magpadayon ang mga maayong buhat sa iyang gipanguluhan nga 51st Marine Reserve Battalion.
Sumala ni Osmeña nga kini iya na usab nga gi-reactivate karon aron motabang sa gipahigayong clean up drive sa kabarangayan sa dakbayan.
Kini ilabina diha sa barangay Bulacao ug Pardo nga giingong nakasinati og outbreak sa sakit nga dengue sa niaging pipila ka semana.