Oposisyon sa dakbayan di motuong walay paluyohan si Tomas

Ang mga sakop sa oposisyon dili motuo nga walay suportahang kandidato sa barangay si Mayor Tomas Osmeña sa piniliay sa barangay sa Oktobre 29.

Mao kini gibutyag ni Kapitan Danilo Lim sa Pardo kinsa nagkanayon nga pagpakaaron-ingnon lamang kining kang Osmeña aron patuohon  ang katawhan.

Si Lim kinsa kaalyado ni kanhi Mayor Alvin Garcia miingon nga dili angayang mamakak ang mayor sa publiko sanglit  masayran ra man gihapon sa katawhan ang tinuod.

Si Lim mikomentaryo niini human  masayri niya ang pamahayag ni Osmeña kinsa misaad nga wala siya’y ituboy nga kandidato karong umaabot nga election tungod kay gawas nga wa siya’y kuwarta, itugyan niya sa katawhan ang pagpagawas sa ilang kaugalingong opinyon ug prinsipyo sa pagpili.

Gusto sa mayor nga mas maayong maanad ang publiko sa pagbotar nga way kuwartahay aron motunhay gayud ang tinuod nga hustisya ilabi na sa pagpili og mangatungdanan sa kagamhanan.

Apan matud pa ni Lim nga pagarpar lamang kining sa mayor kay nasuta na niya nga ang taga Bando Osmeña Pundok Kauswagan hapit na makalukop sa tanang sitio sa Pardo aron pagpangulitawo sa katawhan ug paghangyo og suporta unya sa election.

Giangkon usab kini ni Kapitan Clemente Rosales BOPK gihapon sa barangay Apas kinsa nagkanayon nga gisuroy na nila ang mga kabalayan sa Apas bisan wala pay campaign period.

Kini pagpakita lang sa ilang dakong tinguha nga botohan  ang ilang grupo sa umaabot nga piniliay.

Wala hinuon motug-an si Rosales kun ayudahan ba sila’g kuwarta sa mayor ilabi na sa panahon sa campaign period.

Si Lim sa iyang bahin miingon  nga isekreto lamang sa mayor ang iyang tabang ngadto sa mga kapitan sa barangay nga kaalyado niya aron pagpakita sa iyang mga kaatbang nga kaantigo siya moduwa sa politika.