Mikabat sa P250 mil ang danyos sa nahitabong sunog apan walay gikatahong naangol sa maong insidente kagahapon sa buntag diha sa dalan D. Durano, Barangay Suba dakbayan sa Danao.
Si Senior Fire Officer 3 Primo Nuñez sa Danao City Fire Station mibutyag kagahapon sa Banat News nga usa lang ka balay ang nasunog kinsa gipanag-iya kini sa magtiayong Nancy ug Primo Cacia apan giabangan ang maong balay ni Marnily Colina.
Ang nahisgutang balay gigama sa gaay nga materyal ang katunga niini ug ang katunga konkreto diin duha kini ka andana ug adunay unom ka kwarto sa itaas nga bahin ug tulo sa ubos nga bahin.
Matud ni Nuñez nga nadawat nila ang alarma mga alas 10:40 sa buntag ug tulo ka minuto gikan sa ilang pag-alarma nakontrolar nila ang kalayo apan naugdaw gyud ang balay tungod kay sa ilang pag-abot dako na kaayo ang kalayo ug gikaon na ang tibuok balay apan wala makatabok sa laing kabalayan ang kalayo tungod kay nababagan kini sa firewall.