Usa ka sakop sa Bureau of Fire Protection ang namatay human kini pusila sa igsuon sa iyang kaaway dihang iyang gihagit ang suspek nga siya pusilon samtang ang biktima nakig-inom sa iyang higala diha sa dalan Holy Name sa barangay Banilad ning dakbayan kagahapon sa kaadlawon.
Ang biktima giilang si SFO2 Wenceslao Opone, 44, usa ka bombero nga gidestino diha sa Department of Interior and Local Government Patrol 117 ug kasamtangang nagpuyo sa Opone Compound sa Maria Luisa Village sa barangay Banilad.
Samtang giila ang suspek mao si Ronald Ocampo, alyas Adod nga taga Ouano Compound kinsa anak sa konsehal sa maong barangay.
Ang biktima nakaangkon og samad pinusilan sa dughan ug sa iyang ulo nga nakaingon sa iyang kamatayon human pusila og .45 kalibre sa armas.
Ang biktima nakig-inom sa iyang higalang si Geryl Boukeron,38, diha sa maong dapit dihang naagian sa suspek ug gihagad kini ni Boukeron og usa ka tagay.
Sumala pang PO3 Rogelio Nedamo sa Homicide Section nga samtang nag-inom ang biktima ug Boukeron miagi ang suspek ug diha-diha gisultihan kini sa biktima og “pusila ko ninyo Dod.”
Ang suspek gikatahong igo lang mitubag sa pag-ingon og “wala oy” diha-diha dayon milakaw ang suspek palayo apan dangtan pila ka gutlo ang milabay mibalik kini ug may dala nang armas.
Ang suspek daling miduol ug gipusil ang biktima makadaghang higayon ug daling misibat palayo sa dapit.
Nasuta nga ang igsuon ni Ronald nga si Ricky gikiha na kaniadto sa biktima tungod sa pagpusil niini sa naulahi niadtong Abril, mao kini ang gitumbok karong motibo sa kapolisan sa maong pagpatay.