Supt. Labra mopa-imbestigar sa karera police

Dunay himuong imbestigasyon si Cebu City Police Office deputy city police director Supt. Pablo Labra kabahin sa report nga dunay polis nga miduol kang kapitan Roger Ruizo aron pagpangayo'g pabor nga  mo-operate og video karera diha sa ilang barangay.

Kini bisan paman sa pamahayag ni Ruizo ning bag-uhay lang nga niadto pang tuig 2003 kadtong hitaboa ug miklaro nga usa lang ka polis ang miduol kaniya.

Si Ruizo una nang namahayag nga dunay mga polis o polis nga miduol kaniya ug nangayo og pabor nga di lang hilabtan ang iyang ibutang nga mga video karera bugti sa P500 nga inadlaw-adlaw nga suborno ngadto sa kapitan.

Si Labra nagkanayon bisan niadto pang tuig 2003 kini nahitabo ila gihapong padayunon ang imbestigasyon tungod kay nahitabo gihapon kini sulod sa hurisdiksyon sa dakbayan.

Samtang dili motuo ang kapolisan sa Waterfront Police Station nga genuine ang  mga polis nga giingong mitanyag og suborno sa kapitan sa barangay San Roque aron librehon ang kalihokan sa video karera (VK) sa maong lugar.

Matud pa ni SPO1 Manuel Margallo nga  ang operator sa video karera moduol pa og polis aron panalipdan aron magpatabang sa ilang ilegal nga negosyo.

Ang tinuod nga operator modiretso nalang og duol sa kapitan aron tanyagan  og suborno ug dili na moduol  sa polis, dugang pang Margallo.

Ang kapitan nainterbyu sa sibyaanan sa gobiyerno nga DyMR ug migawas kini pagkasunod adlaw sa Banat News hinungdan nga naalarma ang mga polis ug ubang opisyales sa dakbayan tungod niini.

Ang San Roque sulod sa hurisdiksyon sa Waterfront Police Station maong dako ang pagkahingangha sa mga polis sa maong buhatan kabahin sa maong balita. – with Wen Celen