Polis wala makadakop sa tawong may warrant

Napusilan sa mga polis ang usa ka lalaki nga dugay nang gipangita sa balaod tungod sa kasong giatubang niini  human kini misukol sa mga polis nga buot untang  modakop kaniya dihang nibunot kini sa dala niining armas.

Nahitabo kini sa miaging hapon pasado alas 4 diha sa sitio Casia, barangay Lanao lungsod sa Daanbantayan.

Sila si SPO1 Cesar Carlos Alburo, PO1 Edwin Dignos ug PO1 Kaith Castro mipatuman sa warrant of arrest batok kang  Jason Fernandez,  residente sa nahisgutang lugar human kini makit-I sa ilang pinuy-anan.

Si Fernandez nag-atubang og kasong grave threats ug slight physical injury sa 3rd MCTC Daanbantayan ug Medellin.

Apan sa dihang  gilibutan sa mga polis ang maong lugar aron unta i-serve  ang warrant of arrest  gikatahong niibot hinuon kini sa dala niining wala matinong kalibre sa armas ug gition ngadto kang SPO1 Alburo.

Hinungdan nga napugos og pasalba si SPO1 Alburo apan nidasdas hinuon sa nahimutangan ni PO1 Dignos dala ang armas ug gipasalbahan na usab ni Dignos apan wala mopatuo.

Tungod niini gipusil sa mga polis ang suspek aron ma-neutralize  apan bisan og naigo na, nakahigayon pa gyud og dagan paingon sa kamaisan dayon na ngadto sa iyang pag-ikyas.

Daling gigukod sa mga polis ang suspek apan napakyas sila sa pagsikop niini.

Nagtuo ang kapolisan nga naigo ang suspek tungod sa nagpasad nga dugo diha sa kamaisan.

Ang kapolisan sa Daanbantayan padayon pang gipangita ang gikatahapan  kinsa wala na igkita sa ilang lugar.