Motorsiklo sa mga tulisan narekober di layo sa La Nueva

Motorsiklo sa mga tulisan nga mitulis sa armored van diha sa may La Nueva niadtong Lunes narekober na sa mga sakop sa Theft and Robbery Section diha sa dalan Logarta dili layo sa gihitaboan.

Ang maong motorsiklo usa ka Honda XRM nga dunay plakang IA-6346 nga gituuhang maoy gihimong get-away vehicle niadtong Lunes sa mga tulisan.

Ang maong motorsiklo nakarehistro sa pangalan sa usa ka Arnel Soco nga taga 2481-A Francisco Sta. Ana Manila.

Gituuhan sa kapolisan nga gikarnap ug gidala dinhi sa dakbayan sa Sugbu.

Matud sa hepe sa Theft and Robbery Section (TRS) Sr. Insp Alexis Relado nga nakig-alayon siya sa kapolisan didto sa Sta.  Ana Manila ug gipahibaw kabahin sa nahitabong tulis dinhi.

Niadtong Lunes sa hapon, narekober sa kapolisan ang usa ka Toyota Lite Ace van nga kolor metallic gray nga may plakang TGE-779 nga giingong maoy gisakyan sa back-up sa mga tulisan.

Ang grupo sa Bohol Robbery group maoy gitumbok sa kapolisan nga maoy mitulis sa armored van sa Mandarin Security Service Inc. nga gi-hire sa Metro Bank aron kuhaon ang kwarta sa La Nueva.

Duha ka escort sa maong armored van ang gipusil ug nakuha ang gibana-banang P3 milyones nga salapi.

Si Cebu City Police Office Director Sr. Supt Patrocinio Comendador mitug-an nga dako kaayo ang iyang pagsalig nga ilang madakpan ang mga miyembro sa maong grupo.

Giklaro ni Comendador nga dunay insider sa La Nueva Supermart nga nalambigit sa maong tulis nga giingon usa ka gwardya nga maoy naghatag og tip sa grupong Bohol Robbery Group nga gipangulohan ni Casemiro Garcia.

Apan sumala pa niya nga wala pa silay kasayoran kung nagtrabaho ba kining maong tawo o ba kaha empleyado kaniadto sa La Nueva pero ila lang nahibaw-an nga duna gyuy kalambigitan sa tulis ang maong tawo ug mao kini ang ila karong gisusi sa mga kadagkuan sa mga empleyado sa nahisgutang establisamento.

 “As of now we are sending our operatives to pursue the suspects, we received some reports that we have sighted some of the suspects within the area of Central Visayas, in fact we are sending operatives for the follow-up operations,” dugang pang Comendador.

Matud ni Comendador nga iya  nang gipahimangnuan ang mga tagdumala sa mga establisamento ug mga negosyante nga dili gyud magpataka og panawat ug mga security guard tungod kay kasagaran sa na-involve mga gwardya gikan sa nagkalain-laing probinsya.

Si Comendador nipadala na usab og mga sakop sa Bohol aron paggukod niadtong mga tulisan inabagan sa mga sakop ni Sr.Supt. Edgardo Ingking, ang provincial police director sa Bohol.

Duha sa upat ka tulisan duna nay arrest warrant hinungdan nga dili na kaayo maglisod sa pagpasaka og kaso ilabi na kay positibong gitumbok sa mga witnesses.