Politiko gipahimangnoang dili mag-apil apil sa SK, Brgy elections

Nunot niining nagsingabot nga barangay ug SK election, ang Department of Interior and Local Government (DILG-7) subling nipahinumdom ngadto sa mga politiko ug mga lokal nga opisyal nga likayan ang pag-apil apil sa umaabot nga piniliay.

Gibutyag ni Atty. Danilo Almendras, legal counsel sa DILG-7 dihang nahinabi sa Banat News gitakda silang mopagawas og direktiba nga magpahinumdum ngadto sa tanang mga lokal nga opisyal sama sa mga mayor, kongresista ug uban pa nga likayan ang pag-apil apil sa barangay eleksiyon tungod kay usa kini ka non-partisan.

Nipasidaan si Atty. Almendras, nga mahimong mapasakaan og kasong kriminal ug administratiba kadtong mga lokal nga opisyal nga masakpang motabang ang partido niini pagtuboy og mga kandidato pagka-kapitan nga paluyohan.

Nagkanayun si Almendras nga igo lang nilang ipahinumdom ngadto sa mga kandidatu ug lokal nga opisyal ang lagda nga nalatid sa Omnibus Election code aron mapahinumduman ang limitasiyon sa politiko ug kandidato.

Giklaro niya nga mahimong makapadayag og suporta kadtong mga lokal nga opisyal niadtong mga kandidato nga ilang suportahan sa ilang personal nga kapasidad apan gidid-an kini nga motabang sa pagpangampanya.

Paabuton pa hinoon sa DILG ang Commission on Election (Comelec) nga makapagawas og guidelines may labot sa nagsingabot nga piniliay sa barangay ug SK.

Nasayran nga karung Domingo magsugod na usab ang rehistrasyon hangtud sa petsa 22 ning bulana aron makasalmot sa umaabot nga eleksiyon kadtong mga bag-ong botante nga nagpangidarun og 18 anyos ingon man kadtong mga botante nga natangtang sa voterslist human  napakyas pagbotar sa duha ka  milabay’ng pinili-ay.