Napulo na ka mga biktima sa nagkalainlaing dapit sa Sugbu ang positibong mitumbok sa upat ka mga armadong tulisan nga nasikop atol sa checkpoint sa Canduman nga maoy responsable sa pagtulis kanila sa milabay’ng mga adlaw.
Matud pa ni PO3 Danilo Damaolao, hepe sa investigation section sa Station 6 sa Mandaue, sukad nga nadetiner ang upat ka mga suspetsado nga sila si Felix Abad, 29, minyo, Nestor Cabahug, 23, minyo, Jerry Morales, 20, ug Eber Cañete, 19, minyo, tanan mga residente sa Mandaue human kini makuhai og armas diin gidudahan nga mga sakop sa “warak boys robbery group” sobra na sa 10 ka mga biktima sa pagpanghold-up ug pagpanulis ang mitumbok kanila nga maoy responsable sa maong krimen.
Si PO3 Damaolao miingon nga sagad sa mipakita sa ilang buhatan mga biktima gikan sa Mandaue, Liloan, Consolacion ug Lapu-Lapu ug ang labing daghang tudlo amg mitumbok ngadto kang Cabahug.
Sumala pa ni Damaolao nga unang gipasaka nila ngadto sa piskaliya ang kasong kalapasan sa paghupot og walay lisensiya nga armas nga kalapasan sa Akta Republika 8294 ug base sa nakuhang kalibre .38 nga rebolber sa ilang posesyon atol sa checkpoint niadtong Agosto 9.
Samtang gihikay na usab sa nagkadaiyang police station ang mga affidavit sa mga biktima alang sa pagpasaka og linaing kaso batok kanila sa mga dapit diin ang mga reklamante nabiktima sa pagpanulis.
Sa pagkakaron, anaa pa gihapon sa Station 6 ang mga suspetsado ug padayong giawhag sa kapolisan ang mga biktima pag-ila sa mga suspetsado kun sila ba gihapon ang mihimo sa pagpanulis ug pagpang-holdup kanila sa milabay’ng mga adlaw. – Bong Soriano