Gidudahang kawatan gipusil sa silingan

Kritikal ang kahimtang sa usa ka lalaki nga gidudahang kawatan human kini pusila sa iyang silingan niadtong Biyernes alas 5:30 sa hapon diha sa Das, Toledo City.

Samdan sa ulo ang biktimang giila sa kapolisan nga   si Roberto Geraldez  Jr.,  26,  minyo ug residente sa naasoy’ng lugar dihang gipusil sa suspetsadong si Federito Regalado, 43, minyo, ug silingan sa biktima.

Sa pasiunang imbestigasyon ni SPO1 Nestor Nazario ug PO3 Jose Dante Talandron sa Lutopan substation nasayran sa wala pa mahitabo ang pagpamusil sa suspek ngadto sa biktima nahibaw-an nga kining biktima maoy gipasanginlan sa sunod-sunod nga pagkawagtang sa mga butang sulod sa panimalay sa suspek.

Matud pa nga wala na makaagwanta ang suspek sa pagkawagtang  sa iyang mga butang mikuha kini kalibre nga .45 pistol ug gipusil makausa ka higayon tumong sa ulo ang biktima.

Si Geraldez daling gihatod sa tambalanan sa dakbayan sa Sugbu gumikan sa kaseryoso sa samad nga iyang naangkon.

Nakuha sa crime scene ang usa ka  kabhang  sa .45 kalibre nga gituohang maoy gigamit sa suspek pagpusil sa biktima.

Ang kapolisan sa Lutopan substation padayon sa ilang  paggukod   sa suspek human milayas sa ilang dapit.