Lider sa robbery group gitunolan warrant

Lider sa giingong Aldemita robbery group nga kasamtangan pa gihapong natanggong sa Lapulapu City Jail ang gitunolan sa iyang warrant of arrest may labot sa pagtulis ug pagpatay sa usa ka negosyante  sa   Carcar.

Ang warrant of arrest giluwatan ni RTC Branch 7 Judge Simeon Dumdum, Jr. nga robbery with homicide batok kang Felixberto Gelviro Aldemita alyas Junjun ug Mamerto nga taga Guadalupe, Carcar.

Si Aldemita maoy gitumbok sa kapolisan nga lider sa Aldemita Robbery group nga gipasanginlang maoy mitulis sa negosyante og baboy nga magtiayong Mariano Malinog ug Medarda Malinog.

Sumala pang SPO1 Joel Pananganan sa Carcar police station sa pakighinabi sa Banat News ang  pagpanulis nahitabo sa sitio Tan-awan barangay Guadalupe sa naasoy’ng lungsod niadtong Pebrero 15, 2007 diin nadala sa mga suspek ang gibana-banang P100, 000 nga cash sa magtiayon.

Si Mariano gipusil patay sa mga suspek samtang naangol usab si Medarda niadtong tungura. Ang mga suspek daling nakaikyas apan positibong giila sa mga testigos si Aldemita ug Raymund Navares Cabiles, ug usa ka giila lang sa ngalan nga alyas Rolly.

Si Cabiles una na mitahan kang PO2 Fredelson Codilla sa CCPO pipila ka semana human sa pagpanulis. Walay piyansang gitakda ang korte alang sa temporaryong kagawasan sa mga suspek.

Si Sr.Insp. Michael Anthony Bastes, sa Criminal Investigation and Intelligence Branch sa Cebu City Police Office maoy mihatud sa warrant of arrest batok ni Aldemita ug gikatakda kining ipresentar ngadto sa korte aron ibalhog sa Cebu Provincial Detention and Rehabilitation Center.

Si Aldemita natanggong sa Lapulapu human siya ug iyang kaubanang sila si Edmund Macaraeg Punay, 23, taga Taboc Mandaue; Alwin Gelicaña Bertoldo, 23, taga Mantalungon, Barili ug Brando Babao, nasikop sa kapolisan diha sa barangay Kalawisan tungod sa paghupot og mga armas.

Dunay narekober nga mga sketch map ang kapolisan ug mga armas gikan sa grupo nga gituuhang plano sa dakong pagpanulis nga ilang himuon sa dakbayan sa Sugbu nga diin usab nag negosyo ang Intsik usa sa ilang mga target.

Sa ilang pagkasikop nadiskubrehan sa kapolisan ang halapad nga kooperasyon sa mga robbery groups gikan sa Mindanao, Bohol ug sa Carcar aron molusad ug sunod-sunod nga pagpanulis sa Metro Cebu.

Si Babao, kinsa mipiyansa og P40,000 sa sala ni RTC Branch 53 Judge Victor Teves niadtong Hulyo 24 wala na makaabot nga buhi sa Carcar City human kini banhigi samtang sakay og taxi kauban ang iyang mga igsuon ug inahan diha sa dalan S.Osmeña sa may Pier 4.

Nagduda ang kapolisan nga posibleng kauban ra niya ang mitumba kaniya tungod sa kahadlok nga mopiyait kini ug himuong testigos batok sa ilang grupo ug mga prominenteng tawong nagpaluyo kanila.