Patay ang usa ka Intsik nga broker og yuta human kini pusila sa iyang garahean sa Sitio San Roque, Wireless, Subangdaku, Mandaue kagahapon sa buntag.
Ang biktima giila nga si James Yu, 67, minyo, residente sa maong dapit ug nailang real estate broker.
Base sa pasiunang imbestigasyon ni SPO1 Alfredo Andales sa Station 2 sa Mandaue City Police Office posibleng adunay kalambigitan sa iyang negosyo ug sa pagdaog niini sa kaso batok sa mga residente sa usa ka yuta nga ilang gipasakaan og kasong ejectment ngadto sa korte ang pagpusil patay ni Yu.
Base sa pamahayag sa mga saksi nga nahinabi sa Banat News, nasota nga gikan sa ilang panimalay si Yu ug milakaw kini ngadto sa garahean sa iyang sakyanan mga 100 metros gikan sa iyang panimalay.
Atol sa pag-abli sa garahean, usa ka tawo nga gikan sa usa ka tindahan ang mikalit og sunod ni Yu ug dayong pusil niini maka-upat ka higayon dayong pahilayo sa maong dapit sakay sa usa ka motor nga naghuwat nang daan sa unahan.
Si Yu nga samaran sa iyang dughan agi sa kalibre .45, gidali pagdala sa Perpetual Soccour Hospital apan pipila ka gutlo nakabsan kini sa kinabuhi.
Sa pamahayag sa mga residente sa maong dapit, duha na ka adlaw nga ilang nakita ang maong suspetsado sa maong tindahan nga kanunay moinom og beer samtang nagpaniid na diay kini ni Yu kun unsang orasa kini mogawas.
Matud pa ni SPO1 Andales nga sa dihang iyang gikahinabi ang igsuon ni Yu, mipadayag kini nga posibleng adunay nasuya sa negosyo nga real estate sa iyang igsuon.
Gikonpirmar ni SPO1 Andales nga kagahapon sa hapon ang usa sa mga yuta sa Guizo gikatakda unta kini nga i-demolish gumikan sa pagdaog ni Yu sa kasong ejectment batok sa mga eskuwater sa maong dapit nga mitukod og mga balay sa iyang yuta.
Matud pa ni Andales nga ang maong demolition order naggikan kang Mandaue City Regional Trial Court Branch 56 Judge Augustin Vestil nga bag-o lang miretiro sa iyang katungdanan isip huwes.