Patay ang usa ka parolado nga lalaki human kini pusila sa iyang silingan sa walay igong rason kagahapon sa kaadlawon diha sa Sitio Mananga I, Tabunok, Talisay.
Ang biktima giila sa mga polis nga si Roger Bongaitan, 38, residente sa maong lugar kinsa nakaangkon og samad pinusilan sa likod nga bahin sa iyang tuong dunggan diin ang bala milahos sa wala niining dunggan ug daling gidala sa Talisay District Hospital apan gideklara kini sa doktor nga patay na nga naabot sa maong tambalanan.
Ang suspetsado giila usab sa mga polis nga si Jonas Cabrera, nagpuyo usab sa nahisgutang lugar apan daling miikyas human sa maong hitabo ug padayon pa kining gipangita sa mga polis.
Si PO2 Eric Enad sa Homicide Section sa Talisay Police Station mibutyag kagahapon sa buntag sa Banat News nga si Bongaitan nag-inom sa ubos nga bahin sa Sitio Mananga uban sa iyang mga amigo apan migawas sa lugar nga ilang giinoman tungod kay mipalit og sigarilyo.
Kalit lang mitungha si Cabrera ug sa walay igong rason gipusil sa suspetsado si Bongaitan.
Si Enad nagkanayon nga si Bongaitan bag-ong nakagawas sa Talisay City Jail tungod sa kasong illegal possession of firearms kinsa si PO2 Leandro Azarcon ang nakasikop niini.
Si Azarcon sa pakighinabi niini sa Banat News mikompirmar nga kapin na sa usa ka tuig ang milabay nga nasikop niya si Bongaitan dihang nanghasi kini diha sa ilang lugar ug nagdala og pugakhang apan si Bongaitan bag-o lang nakagawas sa prisohan tungod kay naparolan kini.
Si Enad sa laing bahin, mibutyag usab nga si Cabrera usa sa mga maldito diha sa ilang lugar.
Ang kapolisan sa dakbayan mipahigayon og follow-up nga imbestigasyon sa hitabo.