Tulo ka mga publikong tunghaan sa mga bukirang barangay dinhi sa dakbayan sa Sugbu girekomendar nga pabiyaan ug ipabalhin sa laing lugar tungod kay peligro kini sa landslide ilabi na niining pagtumaw sa mga pag-ulan-ulan.
Subay sa gihimong pakisusi sa Mines Gio-Sciences Bureau nakonpirmar nga peligro sa landslide ang mga tunghaan sa Busay Elementary ug Secondary High School, Malobog Elementary School ug ang Buot Taup Elementary School.
Gipadayag ni Ellen Lupo, geologist sa MGB nga gikinahanglan ang dinaliang pag-relocate sa maong mga publikong tunghaan aron paglikay sa peligro sa giatubang sa mga tinun-an ug sa mga magtutudlo ning maong mga tunghaan.
Matud niya nga peligro kaayo sa pagdahili sa yuta ang maong lugar nga gitarukan sa tunghaan sa mga nahisgutang lugar gumikan kay humok ang pundasyon sa luna niining maong mga dapit nga dali ra usab nga modahili ilabi na kun makasinati og mga pag-ulan -ulan.
Giluwatan kining maong rekomendasyon sa MGB human sa nahitabong landslide sa Busay duol sa tunghaan sa maong dapit niadtong milabay’ng semana nga miresulta sa pagka-postpone sa klase ug gipapauli ang tanang mga tinun-an nga gibati og kabalaka gumikan sa maong panghitabo.
Ang Cebu City Disaster Coordinating Council (CCDCC) una nang mihulagway nga landslide prone areas ang nahisgutang mga bukirang barangay.