Kagamhanan naka-recruit og dugang 200 ka mga bag-ong polis aron ikadugang sa mga puwersa nga mobatok sa mga kriminal ilabi na sa mga terorista bisan pa sa ka apiki sa pundo.
Si Chief Superintendent Silverio Alarcio Jr. director sa Regional Police Office PRO-7 nagkanayon nga gihashasan gyud pag-ayo ang 619 ka mga aplikante ug l75 lang ka mga lalaki ug 25 ka babaye ang mipasar sa eksamin.
Matud ni Alarcio nga kung aduna pay budget ang gobiyerno angayan unta nga daghan ang I-recruit matag tuig aron ikahulip sa mga miritero ug sa mga natangtang sa serbisyo nga mga polis.
Gikan sa intelligence test, ngadto sa timbang sa gibug-aton ug sa gitas-on ug kahimtang sa panglawas ang nagsilbing basehan sa kwalipikasyon sa pagsulod sa pagka-polis.
Si Alarcio nagkanayon nga suwerte kaayo ang maong mga aplikante kinsa nahilis usab ang mga sapatos sa pagpunay'g balik-balik sa buhatan sa PRO-7 sulod sa pipila ka buwan samtang nagpaabot sa resulta sa ilang pagpangaplay.
Sa dili pa idestino ngadto sa nagkalainlaing dapit sa Central Visayas ang maong mga recruit bansayon una sila diha sa Police Regional Training School sa barangay Gaas,Balamban.
Ang nahisgutang mga recruits nagkinahanglang mag-agi usab kini og combatant course una sila idestino aron mabansay sila unsaon pagpakig-asdang sa mga kaaway ilabi na kun makasugat sila og mga rebeldeng terorista.