Patay ang usa ka 28 anyos nga lalaki human kini makuryentihan sa live wire samtang nag spray sa mga punoan sa mangga sa usa ka plantasyon uban sa iyang asawa niadtong Sabado sa hapon pasado alas 2 diha sa Baud, Magdugo, Toledo City.
Ang nakuryentihan ug namatay dihadiha giila sa kapolisan ang biktimang si Bernie del Rosario Algabre minyo ug residente sa Das, Highway 81, Lutopan.
Segun sa report nga midangat sa Cebu Provincial Police Office ang biktima nag-spray og mangga sa plantasyon nga gipanag-iya sa ginganlan og Jack Badiana.
Sa Imbestigasyon ni Sr. Insp Eliakim Awit, uban sa taga Cebu Electric Cooperatice (CEBECO) nga si Engineer Eugene Daclan, nasayran nga ang biktima mipahigayon sa pagpang spray sa bunga sa mangga kuyog iyang asawa nga si Justina.
Matud sa taho ang biktima nagsusi sa mga bunga sa mangga apan kalit lang nahikapan ang GI wire gipaagi sa kasagbutan ug gikutay sa kural sa panimalay sa caretaker nga si Bienvenido Lenihan, 62.
Ang linya sa kuryente direktang gikonek ni Lenihan sa poste paingon ngadto sa iyang balay, mga duha na ka semana ang nakalabay.
Si Lenihan wala hinuon mohimakak ug iyang giangkon nga siya maoy nag-instalar sa maong kuryenti sa plantasyon sa mangga hinungdan nga siya gidakop.
Matud pang SPO1 Gil Lastimosa nga nahinabi sa Banat News nga wala makahibalo ang biktima nga ang iyang gikuptan nga alambre diha sa kasagbutan samtang nag spray sa mga mangga usa diay ka live wire nga gikonek sa panimalay ni Lenihan.
Ang GI wire gikompiskar ni Sr. Insp Awit ug gidala sa Toledo City Police Station samtang ang lawas sa biktima gipailawom sa autopsiya sa kapolisan.
Matud ni SPO1 Lastimosa kagahapon nga ang asawa sa biktima gikuhaan na og affidavit aron pormal nang mapasakaan og kaso si Lenihan karong adlawa.