Way hog cholera  sa VisMin

Siyento porsiyento nga gipaneguro sa Department of Agriculture (DA-7) nga luwas sa sakit nga hog cholera ang mga karne nga baboy dinhi sa Kabisay-an ug Mindanao.

Kini maoy giklaro ni Dr. Pedro Balite, hepe sa Livestock and Quarantine sa DA-7 human usab naigo sa hog cholera ang binuhing baboy didto sa Bulacan.

Matud pa ni Balite nga ang Sugbu lakip na ang tibuok rehiyon sa Kabisay-an ug Mindanao dili gyud maapektuhan niini kini tungod kay walay shipment sa mga buhing hayop o karne nga naggikan sa kauluhan.

Gipasabot niini nga ang Sugbu  maoy nag-una nga nagsuplay sa karneng baboy sa kaulohan apil na niini ang silingang probinsya nga moagi dinhi sa Sugbu una pa kini dalhon sa Manila.

Nunot niini, nakapaneguro si Balite nga wala kini dinhi sa Sugbu ug nag-confine lang ang maong matang sa sakit ngadto sa Bulacan diin komon na kaayo sa nasud sa Pilipinas.

Gawas pa niini, adunay mga measure nga gihimo ang Port of Cebu, mga lokal nga kagamhanan ug mga mag-uuma dinhi sa rehiyon pinaagi sa pagpahigayon og pagpamakuna sa mga binuhing baboy sa kalungsuran.

Gani kadtong tag-iya sa piggery gawas nga kanunay susihon, mohimo usab sila og “mass vaccination” sa ilang mga binuhi gumikan kay kun dili kini mabantayan dako usab sila og alkanse.