Akusado bag-ong mipiyansa gipatay

Wala na makaabot nga buhi ang usa ka lalaking gipasanginlang sakop sa Carcar Robbery Group nga bag-ohay pang nakapiyansa kagahapon sa hapon dihang duha ka wala mailhing mga lalaking nagmotor ang mipaulan og bala sa taxi nga iyang gisakyan.

Ang pagpamanhig nahitabo diha sa dalan Mac Arthur Blvd. sa barangay Mabolo duol sa Pier 4 alas 3 pasado na sa hapon wala pay usa ka oras human nakapiyansa ang biktima.

Giila sa iyang igsuon ang namatay mao si Brando Alesna Babao, 41, taga barangay Valladolid dakbayan sa Carcar kinsa gipasakaan og kasong illegal possession of firearms sa Lapulapu police station.

Apil sa naangol mao ang inahan ni Babao   si Elena,64, ug ang drayber sa taxi nga si Roel Siasar sa Worldwide Taxi nga may plakang GWR-213.

Si Siasar dihang gihinabi ni PO3 Rogelio Nedamo sa Homicide Section mitug-an nga nahunong sila niadtong tungura tungod kay stop ang traffic dihang kalit lang may mibuto-buto diha sa ilang likod ug nabatyagan niyang naigo na siya sa bitiis.

Dali nalang siyang mihupo ug migawas sa taxi dayong dagan tabok sa kalsada, wala siya makaklaro sa mga suspek, sumala pang Nedamo sa Banat News.

Si Marvel, igsuon ni Brando sa pakighinabi sa Banat News nagkanayon nga ang iyang inahang si Elena naigo diha sa walang bitiis ug gihatud sa iyang mga igsuong sila si Desideria ug Dexter ngadto sa usa ka tambalanan.

Samtang sa tuong bitiis usab naigo si Siasar apan luwas na ang kahimtang ug naa sa Cebu City Medical Center.

Si Marvel, 44, sa pakighinabi sa Banat News nagkanayon nga gikan pa silang mibutang og P40,000 nga piyansa alang sa temporaryong kagawasan sa iyang manghod ug padulong na unta sa South Bus Terminal aron mamauli sa Carcar City.

Si Marvel sakay sa ikaduhang taxi uban ang iyang ig-agaw ug nagsunod sa gisakyang taxi sa iyang manghod, inahan ug duha ka igsuon apan paghidangat sa nahisgutang dapit naalihan og usa ka trak ang ilang taxi ug nabiyaan sa taxi nga gisakyan sa iyang igsuon.

Nahibulong nalang siya dihang kalit nga nabara ang trapik apan pag-abot niya sa unahan mao nalay iyang nakit-an ang taxi nga gisakyan sa iyang mga igsuon ug inahan nga giabandunar na ug nabuak ang  samin sa luyo.

Nakaangkon og daghang samad pinusilan diha sa likod si Babao nga nakaingon sa iyang hinanaling kamatayon samtang nakuha usab ang pito ka basiyo sa gituuhang 9 millimeter nga bala.

“Sakit kaayo ni namo, kay tarong man to siya nga tawo, kana untang mga tawong naay sala ang ilang ingon-anaon,” asoy pang Marvel.

Matud pa niya nga gwardiya kaniadto si Brando ug kasamtangang nangaplay pagka- heavy equipment operator para sa Saudi Arabia sanglit makaduha na kini ka higayon nga nakatrabaho didto.

Nagtuo siyang nagkaila lang ang iyang igsuon niadtong nangadakpan naalaan lang gyud ang iyang igsuon nga kagrupo nila ni Felixberto Gelviro Aldemita, alyas Mamerto ug Junjun, 25, taga Guadalupe, Carcar City; Edmund Macaraeg Punay, 23, taga Taboc Mandaue; Alwin Gelicaña Bertoldo, 23, taga Mantalungon, Barili.

Si Babao gitugutan ni RTC Branch 53 Judge Victor Teves nga P40,000 lang ang iyang ipiyansa gikan sa P80,000 nga unang gitakda sa korte alang sa iyang temporaryong kagawasan. Alas 2:30 sa hapon siya dihang gi-release sa korte.

Ang upat gituuhang miyembro sa Carcar Robbery Group ug nangadakpan diha sa Kalawisan sa dakbayan sa Lapulapu niadtong Biyernes sa hapon ug pulos sila nakuhaan og armas nga .45 pistola,.357 ug .38 revolvers nga walay mga napakitang legal nga dokumentos.