Masyador gidul-itan og pusil, namatay

Patay ang usa ka masyador sa tigbakayan human kini dul-iti og pusil sa wala mailhing tawo samtang nalingaw kini og tan-aw sa sultada diha sa sulod sa sam-ang sa Lorega sa sitio Lawis sa Lorega San Miguel kagahapon sa hapon.

Ang namatay giilang si Allan Oporto, 42, taga sitio Terra Cora sa barangay Tejero ning dakbayan kinsa mao ray pangita ang pagmasyador sa tigbakayan.

Sa imbestigasyon ni PO3 Henry Orbiso sa Homicide Section nasuta nga usa ka wala mailhing suspek ang kalit nga milipot sa luyong bahin sa biktima ug sa wala igong rason gipusil kini makausa ka higayon.

Ang biktima naigo sa walang bahin sa iyang ulo ug nahulog diha sa ubos tupad sa usa ka bakanteng nitso.

Ang kapolisan naglisod sa pagkuha sa detalye sa insidente sanglit ang mga tawo bisan daghan og nanan-aw sa tigbakay pulos nangambot apan dihay mga bata ug mga tiguwang sa palibot nga miangkong duna gyuy tigbakay niadtong tungora.

Ang biktima naglingkod niadtong tungura sa usa ka gibabag nga kahoy sa ruweda dihang gipusil sa maong tawo ug yano kaayong nakig-uban sa panon sa mga nagkatibulaag nga mga tawo.

Si Orbiso mitug-an sa Banat News nga posibleng atraso ang motibo sa pagpusil sa biktima nga gituuhang gikaaway niini ug naatlan nga nakit-an siya niini diha sa tigbakayan.

Ang asawa sa biktima nga si Mila sa pakighinabi sa mga imbestigador miangkong masyador ra ang panginabuhian sa iyang bana apan wala siya masayod kung duna kini kaatraso.

Apan mitug-an ang asawa sa biktima nga pipila palang ka adlaw ang nakalabay nakasaksi ang iyang bana og insidente sa pagpamusil sa Lorega gani nagkurog pa kini nga mipahibalo kaniya nianang nakauli kini sa ilang balay.

Usa ka babaye diha sa Lorega ang mitug-an sa kapolisan nga kanhi bilanggo si Oporto kaniadto ug nakauban kini sa iyang bana apan di mokumpirmar ang kapolisan niini gumikan kay mismong si Mila mihimakak nga dunay kaso ang iyang bana.