Mga PUJ-Mandaue dili i-uli ni Tomas

Gibakwi ni Mayor Tomas Osmeña ang iyang giluwatang pamahayag labot sa pag-uli sa mga PUJ  mga magbiyahean sa siyudad sa Mandaue nga gi-impound sa Citom.

Alang sa mayor, usa ka seryosong sayop ang iyang nahimo tungod kay giingong dunay kaso nga gipasaka ang mga jeepney driver ug operator batok sa dakbayan.

Tungod niini, miingon si Osmeña nga dili na niya idayon pag-uli ngadto sa mga tag-iya ang nahisgutang mga jeep de pasaheroan.

“We won’t release it because they filed a case against us, so it’s just like a signal to the judge that it’s ok, no, it’s not ok,” sumala pa sa mayor.

Gitataw ni Osmeña nga ang iyang tumong sa pagluwat og pamahayag labot sa pag-release sa maong mga PUJ, mao ang pagpakita og  kaayo sa dakbayan sa Mandaue.

Kini ilabi na nga nagtinguha ang mayor nga ma-donate sa siyudad sa Mandaue ang kabahin sa luna nga gitukoran sa modern abattoir nga gipanag-iya sa maong dakbayan.

Apan tungod sa kiha, miingon ang mayor nga siya dili mahimong mohatag og sayop nga signal sa kaso nga gipasaka sa mga drayber ug operator batok sa siyudad.

Wala usab mohatag og timailhan ang mayor nga kinahanglang isibog una sa mga kihante ang kaso una i-release ang gitanggong mga mga PUJ.

Matud ni Osmeña nga andam moatubang ang dakbayan sa maong kaso.

Kun mahinumduman, gawas sa pag-release sa mga PUJ, buot usab ang mayor nga ibalik sa  kagamhanan Mandaue  ang pagdumala sa North Bus Terminal.

Bugti niini ang pabor nga pangayuon uab ni Osmeña ngadto sa maong dakbayan nga nahisgutan na sa unahan.

Apan buot gihapon sa mayor nga mapadayon ang iyang tinguha ug anaa na sa kagamhanan sa dakbayan sa Mandaue kun unsa ang pangayuon niining tugbang.

Nasayran nga mga opisyal sa nahisgutang siyudad giimbitar ni  Osmeña ug usa ka fellowship dinner karong Huwebes sunod semana.

Gipaabot nga ang tinguha ni Osmeña maoy usa sa ilang hisgutan ug ubang mga kalambuan alang sa duha ka dakbayan.