Patay’ng lawas sa usa ka tawo nga nabulit sa pinusilan nga gituohan sa kapolisan nga gi-salvage ug napalgan nga nagbuy-od sa Hilltop, Casili, Consolacion ang giila na sa iyang pamilya.
Kini ang nasayran sa Banat News kang SP02 Romulo Sasing sa follow up nga gihimo kagahapon.
Giila ang maong patay’ng lawas nga mao si Samuel Basay Sr., 40 anyos, minyo ug lumolupyo sa barangay Jagobiao, dakbayan sa Mandaue.
Matud pa ni SP02 Sasing nga kuyog ang anak sa biktima ug mga kabanay niini maoy niila kaniya sa usa ka punerarya sa Mandaue nga gipahimutangan sa haya sa patay'ng lawas niini.
Si SP02 Sasing miingon nga ang pamilya sa biktima daw wala pa usab masayod sa mamumuno sa biktima sanglit sa ilang dapit wala man sila makamatikod nga aduna kini gikaaway.
Dugang pa niya nga subay sa asoy sa mga kabanay nga milakaw lang ang biktima sa ilang panimalay ug sila masayod kon diin kini paingon ug wala usab sila masayod sa mga kuyog niini. — Romeo T. Limpangog