Buhis sa mga tunghaan ug hospital 'dak-an

Disidido na ang kagamhanan sa siyudad sa Sugbu pagpatuman sa tax ordinance alang sa mga tunghaan ug tambalanan sa dakbayan.

Kini maoy gibutyag ni City Administrator Francisco Fernandez taliwala sa hugot nga pagsupak sa pipila ka mga ospital ug unibersidad sa siyudad.

Giklaro hinuon ni Fernandez nga mas ubos na  karon ang ipatuman nga buhis human usab pa-us-usi ni Mayor Tomas Osmeña.

Nasayran nga niadtong tuig 2002, gipatuman ang 2.5 porsiyento nga buhis sa kinatibuk-ang kita sa mga tunghaan ug tambalanan sa dakbayan.

Apan tungod sa pagsupak sa tanang apektadong institusyon, gipaubsan kini ngadto sa P15 mil sa unang usa ka milyon ka pesos, ug ¾ sa usa ka porsiyento sa sobra sa gross income.

Sumala ni Fernandez nga ang maong matang sa buhis gipatuman na sa ubang siyudad sa nasud ug walay rason nga dili kini ipatuman dinhi sa dakbayan.

Kini bisan pa man sa kaso nga gipasaka sa pito ka tunghaan ug tambalanan sa siyudad ngadto sa hukmanan nga magpaway bili sa ordinansa.

Giklaro hinuon ni Fernandez nga ang pahamtangan sa nahisgotang buhis mao ang mga tunghaan ug tambalanan nga gitawag og propietary ug dili ang mga non-stock, non-profit institutions.

Kini sama sa mga mikiha sa siyudad nga mao ang Cebu Doctor's University, Cebu Doctor's Hospital, Cebu Institute of Technology, Southwestern University, Sacred Heart Hospital, Cebu North General Hospital ug Cebu Velez General Hospital.

Ang City Attorney's Office nakadawat na niadtong miaging adlaw sa kopya sa reklamo ug summon sa korte pagpatubag sa siyudad sulod sa 15 ka adlaw.

Matud ni Atty. Lyndon Basan nga posibleng sa sunod semana nila ipadangat ang ilang motion to dismiss labot sa nahisgotang reklamo.

Sa kasamtangan, ang City Treasurer's Office mipadangat na og demand letter ngadto sa mga tunghaan ug tambalanan nga nagdumili pagbayad sa ilang buhis.

Matud ni City Treasurer Tessie Camarillo anaa na sa City Attorney's Office ang paghimo og tukmang lakang batok sa nahisgotang mga tunghaan ug tambalanan.