Lalaki gibulit og dunggab

Napalgang patay ug nabulit og samad dinunggaban sa nagkadaiyang parte sa iyang kalawasan ang usa ka batan-on diha sa dalan Macupa sa barangay Basak-San Nicolas kagahapon sa kaadlawon.

Ang biktima giilang si Lorenzo Gesem Gadingan, alyas Laurence,27, residente sa sitio Katangkungan sa barangay Basak-Pardo ning dakbayan.

Wala pa mailhi sa kapolisan ang mamumuno sa biktima apan gituuhang dako kini og kasuko sa gipatay gumikan sa nahiagumang daghang samad sa kalawasan sa gipatay.

Ang biktima daghang samad dinunggaban diha sa liog, tuong bahin sa dughan, walang bukton ug likod nga maoy gituuhang nakaingon sa hinanali niining kamatayon.

Sa imbestigasyon sa Homicide Section pinanguluhan ni PO3 Henry Orbiso, nasuta nga sa sayo pa niana ang biktima kauban ni Norman Pajaron Pegaredo, 25, taga sitio Villa San Pedro sa Basak-Pardo didto sa Rama Compound sa Basak-San Nicolas aron manan-aw sa gipahigayong Miss Gay contest.

Human niadto, ang duruha nagkasabot nga mangadto sa usa ka Internet café   uban sa lain pa nilang mga higala apan samtang sila nagpadulong sa maong lugar gikatahong mibuwag kanila ang biktima ug miagi sa laing dalan.

Nahibulong nalang sila nga wala makaabot sa maong internet café ang biktima ug diha nalang nila nasayran nga nakit-an kining patay na ug nabulit og samad dinunggaban ang kalawasan.

Wala pa matino sa kapolisan kung duna bay gikaaway ang biktima sa maong dapit.