Nahutdan og swerte ang upat ka gidudahang mga tulisan human sila masikop sa mga mirespondeng polis pipila palang ka minutos human sila makapanulis sa ilang mga biktima gikan sa managlahing higayon.
Ang unang nadakpan giilang sila si Roldan Limutan; Eduardo Sentilla ug Tomas Labora pulos mga residente sa sitio Tanay sa barangay Pulangbato ning dakbayan.
Ang mga suspek positibong giila sa ilang biktimang si Stella Marie Baltazar, residente sa dakbayan sa Talisay kinsa kasamtangang naglakaw diha sa may barangay Banilad dihang gibabagan sa usa ka motorsiklong kolor asul nga gisakyan sa tulo ka suspek.
Ang mga suspek armado og wala matinong kalibre sa armas daling mition sa biktima ug gikuha ang shoulder bag niini nga maoy gisudlan sa iyang 6600 nga Nokia cellphone nga nagkantidad og P7,000; kwartang P3,800; ug personal nga gamit nga nagkantidad og P900.
Ang biktima daling misumbong sa kapolisan ug daling gilusad sa Anti Robbery and Thievery Task Force pinanguluhan ni Supt. Pablo Labra, Sr.Insp. George Ylanan ug Insp. Michael Bastes ang hot pursuit operation nga miresulta sa pagkasikop ni Limutan diha sa barangay Pit-os.
Si Limutan positibong giila sa biktima nga maoy usa sa tulo ka tawong mitulis kaniya. Pinaagi sa impormasyong nakuha gikan kang Limutan giadto sa kapolisan ang gipuy-an sa duha pa ka mga kaubanan niini diha sa Pulangbato hinungdan usab sa pagkasikop nila ni Sentillas ug Labora ug positibo gihapong giila sa biktima.
Ang tulo pulos nakuhaan og tagsa ka mga paltik nga .38 snubnose revolver nga parehong dunay sulod nga tag-tulo ka buhing bala.
Wala na hinuon marekober sa kapolisan ang mga kabtangan sa biktima sanglit gituuhang gibahin-bahin na kini ug gipamaligya sa mga suspek.
Samtang sa laing hitabo, kagahapon sa buntag gidemalas usab ang usa ka gipasanginlang tulisan nga si Joel Rabago Sanchez, 28, taga sitio Alumnus sa barangay Mambaling.
Kini dihang atol sa iyang pag-ikyas human tulisa ang usa ka giilang si Jason Pascual Garrido nga taga Duljo-Fatima didto siya nipadulong sa gihimutangan sa duha ka polis sa Carbon nga nagpatrolya.
Gitulis ni Sanchez si Garrido sa dalan Magallanes sa Ermita ug gikuha sa suspek ang mahalong cellphone sa biktima nga nagkantidad og P22,000.
Sila si PO2 Jonathan Almendra ug PO1 Joel Perellano kasamtangang nagpatrolya sa maong dapit dihang ilang gikasugat ang suspek samtang kini gigukod sa biktima.
Diha-diha gisikop sa duha si Sanchez ug nakuhaan kini og usa ka paltik nga .38 rebolber ug atol sa pagrekisa narekober gikan kaniya ang cellphone sa biktima ug ingon man diha sa sekretong bulsa gikatahong nakuhaan siya og duha ka paketeng gidudahang shabu.
Ang maong task force gitukod ni Sr.Supt. Patrocinio Comendador aron madungagan pa ang kasiguruhan sa publiko diha sa kadalanan nunot na sa umaabot nga abli sa klase.
Gilangkuban ang task force sa Criminal Investigation and Intelligence Branch; Vice Control Section; Theft and Robbery Section; Mobile Patrol Group; Traffic Group; Special Weapons and Tactics nga pulos mga special units sa Cebu City Police Office.