Sulod sa usa ka bulan nga pagtagotago, nasikop na gyud sa kapolisan ang usa ka iladong drug pusher sa Sitio Tabay, Agos, Lapulapu sa milabay’ng gabii.
Ang nasikop mao si Lucio Sagarino, residente sa maong dapit ug adunay kasong kalapasan sa Sec. 11 Art. ll sa RA 9165 kun pagpayuhot og ginadiling drugas.
Matud pa ni SPO3 Mario Poblete, hepe sa Operations Section nga si Sagarino nakaipsot atol sa ilang gipahigayong buy-bust operation sa milabay’ng Marso, apan gumikan sa search warrant nga dala sa mga operatiba nakuhaan kini og mga ebidensiya hinungdan sa pagpasaka og kaso ug paglusot sa warrant of arrest niadtong Abril 30, 2007 nga giluwatan ni Regional Trial Court Judge Macaundas Hadjirasul.
Gumikan sa impormasyon nga nadawat sa kapolisan nga mibalik sa iyang gipuy-an si Sagarino hinungdan sa iyang pagkasikop sa milabay’ng gabii.
Kagahapon pormal na nga gibalik ngadto sa korte ang warrant of arrest ni Sagarino lakip na sa pagpakita sa presensiya niini ngadto sa huwes.