Nagkaanam na og ka bayolente ang mga pagpanulis nga sagad mahitabo diha sa kadalanan nga binuhatan sa mga wala mailhing mga lalaki nga magsakay og motorsiklo dinhi sa dakbayan.
Kagahapon sa kaadlawon, duha ka mga babaye ang gibabagan sa duha ka mga tulisang luwan sa usa ka kolor pulang motorsiklo samtang naglakaw diha sa eskina sa F.Gonzalez ug Escario sa barangay Camputhaw, apan bisan nakuha na ang ilang bag gihapsan gihapon sila og armas.
Ang mga biktima giilang sila si Kerstin Hermoso Gimena, 20, taga La Guardia sa Lahug ug Karen Suson Manayaga, 20, taga PC Hills sa Maracas, Lahug.
Sa imbestigasyon sa Theft and Robbery Section, ang duha naglakaw diha sa maong lugar dihang gisundan sa mga suspek ug kalit nga gibabagan.
Ang backrider daling mikanaog ug giduol si Manayaga dayong gibunlot ang shoulder bag niini dungan sa pag-ingon og “cellphone lang miss.”
Si Gimena pagkakita sa gihimo sa suspek misuway kini sa pagbabag ug gikuptan ang shoulder bag sa kauban apan ang suspek mibunot og wala matinong kalibre sa armas ug gihapsan sa kutokuto ang dalaga hinungdan sa iyang pagkalup-og.
Ang suspek subling milabnot sa shoulder bag ni Manayaga apan bisan nakuha na ang bag iyang pang gihapsan ang dughan sa nahauna kinsa nalup-og usab sa dalan.
Ang duha ka mga tulisan daling miikyas sa wala matinong direksyon samtang ang mga biktima daling misumbong ngadto sa buhatan sa TRS.
Niadtong kaadlawon sa milabay'ng Mayo 22 ning tuiga, usa usab ka babaye ang giilugan sa iyang bag sa duha ka mga tulisang nagsakay og motorsiklong kolor blue diha sa Edison Street duol sa St.Therese Parish Church.
Ang biktima giilang si Lourdes Flores Mendoza nga taga Toralba Street sa barangay Apas dihang gisundan sa mga suspek ug gibunlot ang bag niini.
Si Mendoza wala dayon makabuhi sa iyang bag hinungdan nga naguroy kini sa motorsiklo. Ang mga suspek dali usab nga nakaikyas human sa pagpanulis apan nakuha sa biktima ang plate number sa motor nga GS-9107.
Samtang niadtong buntag sa milabayng Sabado diha gihapon sa dalan F.Gonzalez sa barangay Camputhaw, usa ka Bernardita Fernandez Cabido,42, taga Mars Street sa Villa Cristina Subdivision sa Punta Prinsesa ang nabiktima manglabnihay nga nagsakay gihapon og motorsiklo.
Ang biktima kasamtangang naglakaw dihang gisundan sa mga tulisang sakay sa kolor pula nga motorsiklo ug sa kalit lang gibunlot sa backrider ang iyang itom nga bag.
Sa kahadlok nga dagmalan wala nalang pugngi sa ginang ang iyang bag ug dali usab nga misutoy og ikyas ang mga suspek.
Nadala sa mga tulisan ang bag niyang nagbalor og P1,000; kwartang P500; cellphone nga nagkantidad og P11,000; ug pitakang Louise Vetton nga nagkantidad og P1,200.
Si Chief Insp. Alexis Relado, hepe sa TRS daan ng namahayag nga sugod karong nagkaduol na ang klase gipaabot gyud nilang modagsa usab ang mga insidente sa pagpanulis, labni ug kawat.
Nunot niini gimando niyang duha na ka teams matag adlaw ang magpatrolya. Samtang si Sr.Supt. Patrocinio Comendador, direktor sa Cebu City Police Office mitug-an nga pangusgan nila ang pagpatrolya sa kaadlawon.
Kini human mamatikding midaghan ang mga insidente sa pagpanulis inig kakaadlawon.