Coco levy dalion og sulbad – ABA AKO

Nanawagan karon ang ABA-AKO party list sa Sandiganbayan sa labing dali nga panahon nga maresolbar ang kaso kabahin sa Coconut Levy base sa giluwatan nga kamanduan sa Korte Suprema may lima na ka tuig ang nakalabay.

Si Leonardo Montemayor, usa sa mga nominee sa ABA-AKO party list nga kanhi usab kalihim sa Department of Agriculture miingon nga ang mga mag-uuma naghuwat sa 20 ka tuig nga mahatagan na unta og tubag ang ilang gipangandoy.

Matud pa ni Montemayor nga ang mga mag-uuma sa lubi nga nagpuyo dinhi sa Sugbu ug uban pang bahin sa pobinsya sa Sugbu ug Kabisay-an ingon man sa Luzon nanginahanglan na gayud ug kuwarta nga ilang magamit.

Kini base sa mga kalamidad nga ilang nasugatan sa miaging mga katuigan nga nakahatag usab og dakong epekto sa ilang produkto sa umahan.

Gawas sa resolusyon nga giluwatan sa Korte Suprema nga mipabor sa gagmay’ng mga mag-uuma sa lubi, si Montemayor mitataw usab nga kinahanglan adunay maayong mekanismo pagsiguro nga matarong ang paggamit sa maong gahin.

Nabalaka si Montemayor nga ang kabahin unya sa maong gahin magamit sa pagpangawkaw sa uban nga tawo.

Gisaway usab sa ABA-AKO paryt list ang pangangkon sa uban nga grupo nga sila mao gayud ang tinud-anay nga kahugpongan sa mga mag-uuma sa lubi.

Gipasabot sa ABA-AKO party list nga ang ilang kaanib nga kahugpongan mihimo sa pakigbatok alang sa ilang katungod sulod sa 50 ka tuig.

Gipasalig nila nga ang ABA-AKO party list mao gayud ang tinud-anay nga magdala sa tingog sa mga mag-uuma sa lubi didto unya sa ubos balay balauranan.