Reunion nagubot, polis samdan

Grand Alumni Reunion nga gipahigayon sulod sa quadrangle sa Panalipan National High School sa Catmon nagubot human miulbo ang panaglalis sa milabay’ng adlaw.

Base sa imbestigasyon nga gihimo sa kapolisan sa Catmon samdan sila si Ben Jorquia, 31, residente sa Sitio Tinipgan barangay Panalipan sa maong lungsod ug PO1 Rey Prosia residente sa Sitio Bakhao, barangay Catmon Daan, nga usa ka miyembro sa PNP ug FTP sa Cebu City Police Office nga pulos mitambong sa maong reunion.

Matud pa ni PO3 Arnel Fruta nga gikahinabi sa Banat News nga mitumaw ang panaglalis tali nila ni Ben Jorquia ug ni Romeo Dumalag alyas Boyet nga miresulta sa panagsinukmagay sa duha.

Ug giuwang kini sila ni PO1 Prosia apan sa pipila ka gutlo lang kalit nga adunay midunggab kang Prosia ug Jorquia nga matud pa apil usab sa maong reunion.

Matud pa ni PO3 Fruta nga si Jorquia nakaangkon og samad-dinunggaban sa iyang ilok ug si PO1 Prosia nakaangkon og tulo ka samad-dinunggaban sa buko-buko.

Midugang si PO3 Fruta nga adunay na sila’y lead sa maong insidente ug sa pagkakaron padayon lang gihapon ang ilang imbistigasyon kay matud pa kompirmadong apil sa maong reunion ang midunggab sa duha ka biktima ug ang suspetsado giila nga si Arden Sucalit.