Gamit sa eleksiyon wala pa maabot – Comelec

Hangtod karon padayong nagpaabot ang mga opisyal sa Commission on Elections (Comelec) dinhi sa Sugbu sa mga election paraphernalia nga maoy gamiton sa eleksiyon nga ipahigayon karong Lunes.

Gibutyag ni Comelec Provincial Supervisor Lionel Marco Castiliano hangtod karon wala pay gipadala gikan sa ilang ulohang buhatan sa Comelec nga mga kagamitan sa eleksiyon sama sa mga election return, mga balota, indilible ink ug uban pa.

Apan daling gidepensahan ni Castiliano nga sagad moabot ang maong mga kagamitan sa eleksiyon duha ka adlaw sa dili pa ang adlaw nga gitakda ang nahisgotang piniliay.

Hinuon gipasalig ni Castiliano nga andam na sila alang sa pagpahigayon sa eleksiyon sa Lunes gawas lang sa mga election paraphernalia nga mao nalang karoy kulang.

Gani andam na karon ang mga ballot boxes nga maoy gamiton sa mga kalungsoran ug dakbayan nga sakop sa lalawigan sa Sugbu sa pagahimuong eleksiyon.

Nunot niini, gipasalig ni Castiliano nga ilang himuon ang tanan aron mapatunhay ang nahisgotang piniliay nga patas ug walay pagpinig.

Samtang gipahibalo usab ni city election officer for the north Marchel Sarno nga miabot na niadto pang milabay''ng adlaw ang mga voter''s information sheet gikan sa kaulohan ug gisugdan na nila kini karon og apud-apod pinaagi sa mga kapitan ug opisyal sa kabarangayan tungod sa kahigpit na sa higayon.

Ang voter''s information sheet maoy maghatag og hustong inpormasyon sa mga botante sa ilang pagpili og mga kandidato gikan sa pagka-senador, pagka-kongresista ug ngadto na sa pagka-mayor ug konsehal sa umaabot piniliay.

Gipasalig ni Sarno nga makumpleto nila ang pag-apod-apod niini kutob sa adlaw''ng Biyernes.