Dugang platoon sa PNP ipadala sa Bantayan

Dugang usa ka platoon sa polis ang ipadala ngadto sa Bantayan Island samtang ang tanang polis lakip na mga hepe sa Madridejos ug Sta. Fe gi-swap tungod sa mga alegasyon sa isig ka partido sa mga kandidato sa maong mga lungsod batok sa ilang mga polis.

Si Chief Supt. Silverio Alarcio,Jr. direktor sa Police Regional Office 7 mitug-an sa mga tigbalita nga gawas sa napadala nang daan nga mga tropa sa Provincial Police Office nga mga sakop sa Special Reaction Unit dugangan pa kini karon og usa pa ka platoon gikan sa Regional Mobile Group.

"Because there are charges from both camps that this policemen are supporting the other party, the swapping is to show them that the PNP is a non partisan organization," asoy pang Alarcio.

Ang kamandoan gisugdan dayon kagahapon apan giklaro ni Alarcio nga may bendisyon kini sa Comelec ug libkason lang kini inig kahuman na unya sa eleksyon.

Ang Isla sa Bantayan girekomendar sa kapolisan nga ipailawom sa Comelec control apan wala pa hinuon kini maaprubahi sa kaulohan tungod sa mga bayolenteng nahitabo sa panagribal sa mga kandidato.

Samtang dugang polis dili bahinon kundili usahon sila isip reserbang pwersa kung dunay kagubot nga mahitabo. Duna say mga tropa sa 78th Infantry Battalion nga gidestino sa maong dapit.

Hinuon giklaro ni Alarcio nga dili makapanginlabot ang AFP sa kalihukan sa eleksyon gawas nalang kung dunay seryosong hulga sa seguridad nga dili na madala sa kapolisan.

Sa pagkakaron dunay 3,089 ka mga polling precincts sa tibuok Rehiyon 7 ug plano sa PRO-7 nga butangan og usa ka polis matag presinto samtang duna mga ibutang nga reserbang tropa sa matag lungsod.

Dunay kapin 6,000 ka tropa ang PRO-7 ug duna say gatusan ka mga polis nga moabag kanila gikan sa national support units sama sa Criminal Investigation and Detection Group, Traffic Group ug uban pa.