Gipadayag kini niya sa press conference nga gipahigayon niadtong miaging adlaw diin iyang gipasigarbo ang mga programa nga iyang nahimo nga iyang gipang-apod-apod sa Cordova, LapuLapu, Mandaue ug Consolacion.
Si Soon-Ruiz miladlad sa iyang mga nahimo sa ikaunom nga distrito isip pagpakita sa dakong kalainan batok sa iyang mga kaatbang nga kandidato nga sila si kanhi Gobernador Vicente dela Serna ug Bokal Gabriel Luis Quisumbing.
Naglakip sa mga programa ni Soon-Ruiz nga iyang gihatagan og dakong pagtagad mao ang programa sa edukasyon nga naglakip sa pagpatukod og gatusan ka mga school building, scholarship sa kabus nga kabataan ug uban pa.
Gipakita usab ni Soon-Ruiz ang iyang kakugi nga naglakip sa pagsumpo sa mikuyanap nga balatian nga AIDS nga nakapadayag sa ilang pagdayeg.
Gipaagi sa sulat ni Deborah Landey, deputy executive director sa United Nations AIDS Program, ang pagdayeg kang Soon-Ruiz nga giubanan usab sa mga pagpasalamat.
"Commend you for strong support in the regional AIDS Commission and to expand work on HIV and AIDS program with key leaders," nagkanayon ang maong sulat nga gipadala kaniya.
Gitudlo usab siya nga chairman sa Special Committee on Millennium Development Goals nga maoy nagpaila sa dakong pagsalig ngadto kaniya sa kadagkoan sa liderato sa kamara sa 13th Congress.