Santiago suportado sa mga negosyante sa pakisusi vs Gwen

Suportado sa mga negosyante ug nagkalainlaing organisasyong sibil si acting Deputy Ombudsman for the Visayas Virginia Santiago aron kini mahimong opisyal nga Deputy Ombudsman sa Kabisay-an.

Ang suporta gihimo sa mga Sugbuanong pundok kinsa misanong sa usa ka "signature campaign" nga gipasiugdahan ni Fr. Carmelo Diola, pangulo sa Dilaab Foundation.

Matud pa ni Diola nga gipadala nila kang Presidential Management Staff Cerge Remonde ang kagatusan ka pirma sa mga negosyante ug mga miyembro sa nagkalainlaing organisayon dinhi sa Cebu niadtong miaging semana.

Sa ibabaw sa maong mga pirma mao ang usa ka opisyal nga suwat-ngadto kang Presidente Gloria Macapagal-Arroyo nga nagpasabot nga angayang ituboy ngadto sa pagka deputy Ombudsman si Santiago tungod kay isog kini ug kasaligan sa iyang baruganan pagsuporta sa kampanya sa administrasyon karon batok sa korapsyon.

Ang Dilaab maoy nagsakop usab sa grupong "Barug Pilipino", nga maoy mipakitag lig-ong pagsaway batok sa graft and corruption." Kamatuoran", nga lig-ong misaway sa gitawag nga narco-politics, ug "friends of Pedro Foundation," nga maoy kanunay nga nanalipod sa katungod sa mga Overseas Filipino Workers (OFW).

Usa sa malampusong lakang ni Santiago nga nakapalig-on sa pagsalig sa nahisgotang mga grupo mao ang pagkasuspenso sa mga opisyal sa kagamhanang nahilambigit sa isyung overpricing sa mga "decorative lamppost" sa dakbayan sa Mandaue ug Lapu-Lapu.

Karong gihulga si Santiago nga ikiha sa kasong kriminal ug administratiba gumikan sa giingong bias siya sa pag-imbistigar sa "overpricing issue" sa Cebu International Convention Center (CICC), gituohan sa iyang mga dumadapig nga dili na hidutlan si Santiago niini.

Misaad si Diola nga andam sila sa pagpaluyo kang Santiago aron dili kini apiktahan sa mga hulgang politikanhon.

Sa laing bahin, si Kongresista Satur Ocampo miyukbo sa Sugbuanon nga gusto makabalo sa kamatuoran mahitungod sa giingon nga overpricing sa CICC ug decorative lamppost kini base sa interbyu ni Leo Lastimosa sa programa niini sa DyAB kagahapon sa buntag.

Dako ang kasagmuyo ni Ocampo sa gihimong aksyon ni Gobernador Gwendolyn Garcia pagpasaka og kasong kriminal ug administratiba batok ni Deputy Ombudsman for the Visayas Virginia Palanca Santiago nga maoy nag-imbestigar sa kaso.

Matud pa ni Ocampo dili angay manimalos si Garcia ngadto sa imbestigador tungod kay maguba lang ang integridad sa justice system ilabi na sa anti-graft cases diin ang mga akusado mosumbalik usab pagpasaka og kaso sa imbestigador. - Wen Celen ug Gia Illustre Racal