2 ra ka presinto daghan nahimong buy-bust operation

Duha lang ka mga police stations sa dakbayan sa Sugbu ang dunay daghang gilusad nga buy-bust operations batok sa mga drug pushers og iligal nga drugas samtang ang ubang police stations igo lang nakasakmit og drugas sa mga suspek.

Kini maoy gibutyag ni Sr.Supt. Patrocinio Comendador, ang direktor sa Cebu City Police Office human kini makakita sa agi sa iyang mga sakop sugod niadtong bulan sa Enero 01 hangtud sa Marso 31 ning tuiga.

Ang Police Station 10 maoy dunay labing daghan og gilusad nga operasyon batok sa mga drug pushers pinaagi sa buy-bust operation samtang ikaduha usab ang Parian Police station.

Samtang ang uban ingon man mga special units dili kaayo daghan og nahimong buy-bust operation apan daghan hinuon og nadakpang nagdala o ba kaha naghupot og iligal nga drogas.

Ang mga suspek(drug pushers) nga madakpan nga namaligya og iligal nga drugas atol sa buy-bust operation pasakaan sa kapolisan og paglapas sa Section 5 sa Article II sa Republic Act 9165.

Kini dili mahimong mapiyansahan ug mahimong masilutan og pagkabilanggo sa tibuok kinabuhi ug posible usab nga mabitay ingon man pagmulta og dakong kantidad nga dili molapas sa P10 milyones.

Samtang kadtong madakpan lang nga naghupot og iligal nga drogas pasakaan og kasong paglapas sa Section 11 kun possession of dangerous drugs sa samang maong balaod apan mamahimong makapiyansa depende sa gidaghanon sa nakuhang iligal nga drugas diha sa ilang posesyon.

Mahimo sad silang masilutan og pagkabilanggo sa tibuok kinabuhi ug posible usab nga mabitay ug pamultahon og tunga sa milyon ngadto na sa diyes milyones.

"Ang ato diha is, we have to revise the trend kinahanglan nga mas daghan ang dakop sa Section 5...we will have to redirect our focus against illegal drug pushing, kinahanglan nga kung anti-illegal drug operation gani ang Section 5 gyud,… this will serve as deterrent to drug pushers," asoy pang Comendador.

Wala hinuon klaruha ni Comendador kung ang gamay nga agi sa kampanya batok sa mga drug pushers may koneksyon sa mas daghan nga natalang illegal drug possessions sa ubang police stations.

Matud pang Comendador posibleng nag-agad ra usab ang mga sakop sa mga hepe kung unsay buot niining i-pokus nga kampanya batok sa iligal nga drogas.

Dunay mga report nga nadawat ang direktor nga dunay mga hiwing polis nga manakop og mga drug pushers apan dili i-rekord nga drug pusher ang ilang nadakpan ug ilang pamenusan ang kaso ngadto lang sa illegal possession kini tungod kay gidudahang ilang gipangwartahan ang mga dinakpan.