Polis nga positibo taktakon

Mibahad si Cebu City Police Office director Sr. Supt. Patrocinio Comendador nga taktakon sa serbisyo ang polis nga mapamatud-ang tiggamitan og ilegal nga drogas.

Ang CCPO mihimo og surpresang drug test sa 93 ka mga polis diin kasagaran mga sakop sa miscellaneous team sa matag police station sa dakbayan tungod sa mga kontrobersyang nalambigitan sa iyang mga sakop ning milabay''ng mga adlaw.

Ang drug test gisugdan niadtong milabay''ng adlaw ug kagahapon natapos diin 89 ka mga polis ug lima ka opisyal ang gikatakdang i-drug test.

Apan niadtong Miyerkules 78 lang sa dili opisyal ang mitumaw ug ang lima ka opisyal samtang unom usab kagahapon ang mitungha ug miiesplikar ug gipa-drug test tungod kay duna silay mga giatimang kaso.

Ang resulta gipaabot nga mogawas tulo ngadto sa lima ka adlaw sugod kagahapon sumala pa sa PNP Crime Laboratory nga maoy mihimo sa eksaminasyon.

"They will be relieved from their assigned units so that they could no longer join anti-illegal drugs operation and they would be put under investigation for conduct unbecoming an officer," matud pang Comendador.

Dugang pa ni Comendador kadtong wala makatungha sa pagpatawag sa drug test patubagon diha sa iyang buhatan ug ipailawom gihapon sa drug test apan ila nang gastos ang pagbayad sa drug test kit nga gibana-banang P300 ang kantidad.

Kadtong mga dili gyud mopakita ug di makapailawom sa drug test suspensuhon og 30 ngadto sa 90 ka adlaw tungod sa kasong less grave neglect of duty.

Samtang kadtong mamatud-ang tiggamitan og drogas ibutang sa Beat Patrol sa kadalanan samtang gipahigayon ang imbestigasyon alang sa ilang pagkatangtang sa serbisyo.