Canvassing sa Ecotech gisupak

Supak ang pipila ka mga kandidato dinhi sa Sugbu sa laraw sa Commission on Elections (Comelec) nga balhinon didto sa Ecotech Center sa Sudlon, Lahug ang canvassing sa dakbayan atol sa eleksiyon sa Mayo 14.

Alang kang Bise Mayor Michael Rama sa Bando Osmeña Pundok Kauswagan (BOPK) tuyoon kaayo ang maong lugar ug peligro ang seguridad niini.

Hinuon misugyot og pipila ka mga lugar dinhi sa dakbayan si Rama nga gihulagway niya nga masayon ug layo sa peligro ug posibleng pagpanggubot.

Gitumbok sa bise mayor ang Chinese Chamber of Commerce and Industry (CCCI) auditorium nga nahimutang sa dalan Llorente, ingon man ang Grand Convention Center ug ang SM nga maoy haum pahigayonan sa canvassing unya sa Mayo.

Nasayran nga misuwat ngadto kang Comelec Commissioner Resurreccion Borra niadtong Abril 24 si City Election Officer for the North Atty. Marchel Sarno aron hangyuon nga balhinon didto sa Ecotech Lahug ang canvassing tungod kay nagpadayon pa ang renovation sa karaang Legislative Building.

Samtang gamay lang kaayo ang kasamtangang session hall karun sa konseho diha sa City Savings Building nga maglisod og sulod ang 22 ka mga sub canvassing committee.